देशको खोजी र रंग अभिज्ञान लोकार्पित

दूरबिन नेपाल     ८ बैशाख २०७५, शनिबार ११:०३    

Anil Baral Real Estate

ललितपुर, ८ वैशाख/ साझा प्रकाशनद्वारा प्रकाशित दुई कृतिहरु प्रदीप नेपालको “देशको खोजी” र तेजेश्वराबाबुु ग्वांगः को “रंग अभिज्ञान” को आज यहाँ लोकार्पण गरियो । सभामुख कृष्णबहादुर महराले नेपालको कथा संग्रह “देशको खोजी” र वाङ्मय शताब्दी पुरुष सत्यमोहन जोशीले ग्वांगः को निबन्ध संग्रह “रंग अभिज्ञान” को विमोचन गर्नुभएको हो ।

सो अवसरमा सभामुख महराले हरेक व्यक्तिको अन्तरचक्षुमा साहित्य हुने गरेको उल्लेख गर्दै भाषा, साहित्यलाई संरक्षण गर्नुपर्नेमा जोड दिनुभयो । साझा प्रकाशनले आफैँ बाँच्न प्रतिस्पर्धी हुनु आवश्यक भएको उल्लेख गर्दै उहाँले सांसदहरुलाई पुस्तक खरिद गराई गाउँ÷गाउँमा पठाउन आफ्नो तर्फबाट सहयोग हुने विश्वास पनि व्यक्त गर्नुभयो ।

संस्कृतिविद् जोशीले बजारमा बिकिने र सामयिक महत्वका पुस्तकलाई साझा प्रकाशनले निरन्तर प्रकाश गर्नुपर्ने बताउनुभयो । समालोकचक डा दयाराम श्रेष्ठ सम्भवले नेपालको एघारौँ कथा संग्रह “देशको खोजी” मा समसामयिकता, राष्ट्रियता, जनपक्षीयताका विषय र पात्र पाइएको तर कतिपय कथाले पाठकलाई विचारको बोझ बोकाएको बताउनुभयो ।

समालोचक डा लक्ष्मणप्रसाद गौतमले ग्वांगः को “रंग अभिज्ञान” ले कला र विम्बलाई रोचकरुपमा प्रस्तुत गरेको धारणा व्यक्त गर्नुभयो । राष्ट्रिय सभाका सदस्य एवं साहित्यकार दीनानाथ शर्माले दुबै पुस्तक गहिरिए पढ्दा त्यसभित्रका गहनता र इन्द्रेणी पाइने बताउनुभयो ।

राष्ट्रिय जनसांस्कृतिक महासंघका अध्यक्ष खगेन्द्र राईले नेपालका कथामा सामाजिक यथार्थवादी चिन्तन पाइने गरेको उल्लेख गर्नुभयो । प्रकाशनका अध्यक्ष एंव महाप्रबन्धक डोलिन्द्रप्रसाद शर्माले पछिल्ला समयमा ५० भन्दा बढी नयाँ साहित्यिक पुस्तक प्रकाशन, व्यापार वृद्धि र संस्था सुधारको कार्ययोजना ल्याई काम गरिएको जानकारी दिनुभयो । रासस


८ बैशाख २०७५, शनिबार ११:०३ मा प्रकाशित