पूर्वी नवलपरासीमा गिद्ध संरक्षण

दूरबिन नेपाल     १२ बैशाख २०७५, बुधबार ११:०१    

Anil Baral Real Estate

नवलपरासी, १२ वैशाख / पूर्वी नवलपरासीमा गिद्ध संरक्षण कार्यलाई निरन्तरता दिइदै आएको छ ।प्रजनन केन्द्रमा गिद्ध हुर्काएर खुल्ला छाड्ने यो अभियान नेपालमा सफल देखिएकाले यसले निरन्तरता पाउँदै आएको हो ।

पटक पूर्वी नवलपरासीको कावासोती नगरपालिका अन्तर्गत नमूना मध्यवर्ती सामुदायिक वनमा जटायु रेष्टुरेन्ट स्थापना गरी गिद्ध संरक्षण हँुदै आएको छ । संभबतः नेपालमा पहिलो पटक गिद्ध संरक्षण गर्न थालिएको सरोकारवालाहरूले जनाएका छन् । दशवर्ष अघि स्थापना भएको यस रेष्टुरेन्टमा हाल ५० गिद्ध छन् ।

पछिल्लो पटक चितवन राष्ट्रिय निकुञ्जको गिद्ध प्रजनन केन्द्रमा हुर्काइएका थप सातवटा गिद्धलाई सामुदायिक वनमा रहेको उक्त रेष्टुरेन्टमा संरक्षणका लागि राखिएको हो ।

संरक्षणको केही महिनापछि ती गिद्धलाई खुल्ला छाडिने जटायु रेस्टुरेन्ट व्यवस्थापन समितिका संयोजक एवं पक्षीविद् डिबी चौधरीले जानकारी दिनुभयो ।

चितवन राष्ट्रिय निकुञ्जका सहायक संरक्षण अधिकृत वेदबहादुर खड्काका अनुसार चार बच्चा, एउटा भाले माउ र दुईपोथी माउ गरी सात गिद्धलाई उक्त रेष्टुरेन्टमा पठाइएको हो ।

यसअघि गत चैत महिनामा पनि चार बच्चा र एक जोडी माउ गिद्धु रेष्टुरेन्ट पठाइएकामा अहिले थप सात र गत चैत महिनामा पठाइएका छ वटा गरी १३ गिद्ध पनि सोही रेष्टुरेन्टमा राखिएको र केही महिनाअछि खुल्ला छाडिने जनाइएको छ ।

खोर बाहिर पनि गिद्धका लागि सिनो र पानी राखिएको छ । खोर बाहिर खाना खान आउने गिद्ध र भित्रका गिद्धबीचमा घुलमिल बढाएर भित्रका गिद्धलाई खुल्ला छाड्ने गरिएको संयोजक चौधरीले बताउनुभयो ।

हाल प्रजनन केन्द्रमा ५० गिद्ध छन् । तिनबाट २१ वटा अण्डा पारिए पनि छ वटाबाट मात्रै बच्चा कोरलिएका छन् । नयाँ जोडीले अण्डा पारेका र चारवटा भूइँमा पारेकाले सबै अण्डा कोरलिन नसकेका हुन् ।

प्रजनन केन्द्रमा डाइक्लोफिनरहित राँगाको मासु गिद्धलाई खुवाइँदै आइएको छ । गिद्ध लोप हुँदै गएपछि सरकारले गिद्ध संरक्षण कार्य शुरु गरेको हो । रासस


१२ बैशाख २०७५, बुधबार ११:०१ मा प्रकाशित