माइक पोम्पिओ नयाँ अमेरिकी विदेश मन्त्री

दूरबिन नेपाल     १३ बैशाख २०७५, बिहीबार १८:५९    

Anil Baral Real Estate

माइक पोम्पिओ नयाँ अमेरिकी विदेश मन्त्री

आज बिहीवार अमेरिकी संसदको माथिल्लो सदन ‘सिनेट’ले ४२ का बिरुद्द ५७ मतले माइक पोम्पिओलाई सेक्रेटरी अफ स्टेट (विदेश मन्त्री)मा अनुमोदन गरेपछि अाजै उनले सर्वोच्च अदालतका न्यायाधीश स्यामुएल एलिटोसंग पद तथा गोपनीयताको सपथ लिएर कार्यभार सम्हालेका छन्। सिनेटमा ५१ सिटमात्र भएको रिपव्लिकन पार्टी बाहेक एक स्वतन्त्र र पाँच डेमोक्रेट सिनेटरहरु समेतको मत पाएर पोम्पिओ अमेरिकी सरकारको सबभन्दा उच्च डिप्लोम्याटका रुपमा अनुमोदित भएका छन्।  

ब्रसेल्समा भोली शुक्रवारबाट शुरु हुने नेटोका विदेशमन्त्रीहरुको बैठकमा उनले अमेरिकी विदेशमन्त्रीको हैसियतमा सहभागिता जनाउने छन्। गत महिना राष्ट्रपति डोनल्ड ट्रम्पले तत्कालीन विदेश मन्त्री रेक्स टिलर्सनलाई बर्खास्त गरेसंगै सोही पदका लागि प्रस्तावित अमेरिकी गुप्तचर निकाय (सिआईए) का निर्देशक पोम्पिओले सेक्रेटरी अफ स्टेटको पद नसम्हाल्दै उत्तर कोरियाली नेता किमसंग भेटेर प्रस्तावित ट्रम्प-किम शिखर-वार्ताको तैयारी शुरु गरिसकेका थिए। ट्रम्पले निकै विश्वास गरेको व्यक्तिका रुपमा अमेरिकी विदेशमन्त्रीको पद सम्हाल्न लागेका पोम्पिओको सफलता अमेरिकाको मित्रशक्ति राष्ट्रहरुसंगको सुदृढ सम्वन्ध, सिरियाको द्धन्द र रसियासंगको तनावपूर्ण सम्वन्धमा सुधार, उत्तर कोरियासंगको परिणाममूखी वार्ता र कोरियाली प्रायद्वीपमा स्थायी शान्तिको सुनिश्चता, ईरानसंगको अमेरिका सहितका शक्ति राष्ट्रहरुले गरेको सम्झौक्ता र  मध्यपूर्व मामिलामा अमेरिकी नीति लगाएतका विषयमा उनले निर्वाह गर्ने भूमिकामा भर पर्ने निश्चित छ। 

कट्टर राष्ट्रवादी नाराले मात्र अन्तराष्ट्रिय सम्वन्ध र मित्रशक्तिहरुसंगको दिगो सहकार्य कायम हुन कठिन हुने संकेत फान्सेली राष्ट्रपति इम्यानुअल म्याक्रोंले अमेरिकी संसदको संयुक्त बैठकलाई मंगलवार विशेष सम्वोधन गर्ने क्रममा दिएसंगै राष्ट्रपति ट्रम्पको ‘अमेरिका पहिले’ भन्ने नीतिमा मित्रशक्तिहरुसंगको व्यवहारमा भने अमेरिकाले पुनर्विचार गर्नु पर्ने संभावना बढाएको छ। 


१३ बैशाख २०७५, बिहीबार १८:५९ मा प्रकाशित