एनआरएनएको नवौं विश्व सम्मेलन शुरु

दूरबिन नेपाल     २८ आश्विन २०७६, मंगलवार ०६:०७    

एनआरएनएको नवौं विश्व सम्मेलन शुरु

शिव नेपाल/ दूरबिन नेपाल

 काठमाडौं । ‘म, मेरो एनआरएनए र मेरो नेपाल’ भन्ने मूल नाराका साथ काठमाडौंमा शुरु भएको गैरआवासीय नेपाली संघ (एनआरएनए)को नवौं विश्व सम्मेलनको उद्घाटन राष्ट्रपति विद्यादेवी भण्डारीले गरेकी छन् । विश्वभर छरिएर रहेका करिव १ हजार ६ सय गैरआवासीय नेपालीहरुले भाग लिएको सो सम्मेलन आजबाट शुरु भई ३ दिनसम्म चल्ने छ ।

PlutonicTech

कार्यक्रमको उद्घाटन गर्दै राष्ट्रपति भण्डारीले विदेशमा छरिएर रहेका नेपालीहरुको ज्ञान, क्षमता र सीपलाई देशको विकासमा लगाउनु पर्ने आवश्यकता रहेको बताउँदै सरकारले गैरआवासीय नेपालीहरुलाई दोहोरो नागरिकताको अधिकार संविधानमा राखिएको उल्लेख गरिन् । राष्ट्रपति भण्डारीले नेपालको पूर्वाधार विकास र शैक्षिक क्षेत्रमा लगानी गर्न गैरआवासीय नेपालीहरुलाई अनुरोध समेत गरिन् ।

यसअघि कार्यक्रममा बोल्दै परराष्ट्रमन्त्री प्रदीप ज्ञवालीले एनआरएनको भावना अनुरुप सरकारले नागरिकता सम्बन्धी कानून संशोधन गर्न लागेको उल्लेख गरे । उनले समृद्ध नेपाल निर्माणमा गैरआवासीय नेपालीहरुको पनि उत्तिकै भूमिका रहने उल्लेख गर्दै सरकारका कामहरुमा साथ दिन आग्रह गरे । नवौं विश्व सम्मेलनको उद्घाटनमा एनआरएनएका अध्यक्ष भवन भट्टले आफ्नो कार्यकालको समिक्षा गर्दै विगत दुई वर्षमा एनआरएनले गुणात्मक फड्को मारेको र आफ्नो नेतृत्वले भावी नेतृत्वलाई थाती रहेका कार्यक्रमहरु पूरा गर्न अवसर छोडेको उल्लेख गरे ।

यसैगरी कार्यक्रममा नेपाल उद्योग बाणिज्य महासंघकी अध्यक्ष भवानी राणाले एनआरएनएसँगको सहकार्य निरन्तर जारी रहने बताइन् । एनआरएनएका पूर्व अध्यक्ष शेष घलेले सरकार र एनआरएनएबीच समृद्ध नेपाल निर्माणमा सहकार्यको आवश्यकत औंल्याए ।

Bhatta Law & Associate

२८ आश्विन २०७६, मंगलवार ०६:०७ मा प्रकाशित