गोप्यरुपमा व्यवस्थापन गरियो बग्दादीको शव

जाङबु शेर्पा     १३ कार्तिक २०७६, बुधबार ००:२०    

गोप्यरुपमा व्यवस्थापन गरियो बग्दादीको शव

जाङबु शेर्पा, दूरबिन नेपाल

स्लामिक स्टेटका नेता अबु बकर अलबग्दादीको शवलाई व्यवजस्थापन गरिएको अमेरिकी सेनाले जनाएको छ । बग्दादीको शरीरका अवशेषहरूको व्यवस्थापन गरिएको अमेरिकी सेनाले जनाएको हो । द्वन्द्वग्रस्त उत्तरी सिरियामा शनिवार अमेरिकी विशेष फौजको कारबाहीमा भाग्ने क्रममा आफ्नै सुसाइड भेस्ट विस्फोट गराई बग्दादीले आत्महत्या गरेका थिए । यद्यपि बग्दादीको शव व्यवस्थापन गरिएको मिति र स्थानबारे भने सेनाले केही खुलाएको छैन । पेन्टागनमा आयोजित पत्रकार सम्मेलनमा रक्षामन्त्री मार्क एस्परले अहिलेको समयको सबैभन्दा जघन्य अपराधका लागि अलबग्दादी जिम्मेवार रहेको बताए । उनले कारवाहीको क्रममा उनका केही अनुयायी पनि मारिएको पुष्टि गरे । इराक र सिरिया क्षेत्रमा क्यालिफेट अर्थात् ईश्वरका प्रतिनिधिबाट शासित राज्यको घोषणा गरेपछि अल बगदादी सन् २०१४ देखि चर्चामा आएका थिए । शनिवार ह्वाइट हाउसमा बोल्दै अमेरिकी राष्ट्रपति डोनल्ड ट्रम्पले एउटा सुरुङभित्र अल बग्दादी भागेर गएका र आफूले लगाएको एउटा सुसाइड भेस्ट विस्फोट गराएको बताएका थिए । ट्रम्पले अमेरिकी फौजको कारबाहीमा ठूलो सङ्ख्यामा अलबग्दादीका अनुयायीहरू समेत मारिएको र नियन्त्रणमा लिइएको बताए । मारिनेहरूमा उनका दुई श्रीमती पनि थिए । उनीहरूले विस्फोट हुने भेस्ट लगाएका थिए, तर त्यसलाई उनीहरूले विस्फोट गराएनन् । इस्लामिक स्टेटले गरेका कैयौँ हत्याका घटनामा हजारौँ मानिसले ज्यान गुमाइसकेका छन् । उक्त जिहादी समूहले करिब ८० लाख मानिसमाथि एउटा क्रुर शासन लादेको थियो । विश्वका विभिन्न स्थानमा गराइएका आक्रमणहरूमा सो समूहले जिम्मेवारी लिंदै आएको छ । इराकी र सिरियाली क्षेत्रका साथै अन्यत्र पनि इस्लामिक स्टेटका लडाकुहरू सक्रिय हुँदा हुँदै संयुक्त राज्य अमेरिकाले यसै महिनाको शुरूतिर क्यालिफेट परास्त भएको घोषणा गरेको थियो । अमेरिकाले उत्तरी सिरियामा नै इस्लामिक स्टेटसंग लडिरहेका कुर्दिसहरुसंगको सहकार्यमा पटक–पटक प्रयासपछि वग्दादीमाथिको कार्वाही हात लागेको थियो । यसअघि अलकायदा नेता ओसमाविन लादेनलाईपनि अमेरिकी विशेष कमाण्डोले पाकिस्तानमा मारेको थियो । लादेनको शवपनि गोप्यरुपमा नै व्यवस्थापन गरिएको थियो ।
एजेन्सिको सहयोगमा

PlutonicTech

१३ कार्तिक २०७६, बुधबार ००:२० मा प्रकाशित