कोरोनाका कारण नेपाल प्रवेशमा कडाइ विदेशबाट फर्केपछि नेपाली नागरिकपनि अनिवार्य क्वारेन्टाइनमा बस्नुपर्ने

दूरबिन नेपाल     २ चैत्र २०७६, आईतवार २१:२९    

Anil Baral Real Estate

दूरबिन नेपाल, न्युयोर्क
संसारभरी कोरोना भाइरसको प्रभाव बढ्दै गएपछि नेपालले पनि कडाइ अपनाउन थालेको छ । नेपाल सरकारको एक उच्चस्तरीइ समितिले यात्रा एडभाइजरी जारी गर्दै नेपाल प्रवेश गर्ने हरेकले कोरोना भाइरस नभएको प्रमाण पेश गर्नु जनाइएको छ । नाकाबाट नेपाल प्रवेश गर्न चाहनेले कोरोना भाइरस नभएको चिकित्सकको चिठी बुझाउनु पर्नेछ । नेपाल सरकारद्वारा गठित नोभल कोरोना रोगको रोकथाम नियन्त्रण उच्चस्तरीय समन्वय समितिले फागुन तीस गते यात्रा एडभाइजरी जारी गरेको हो । जसअनुसार नेपाली नागरिक नै भएपनि विदेशबाट नेपाल प्रवेश गर्दा कोरोना नभएको प्रमाणित गर्नुपर्नेछ वा अनिवार्य क्वारेन्टाइनमा बस्नुपर्नेछ । यात्रा एडभाइजरी मार्च १४ गते राती १२ बजेदेखि लागु भइसकेको छ भने सो अप्रिल ३० तारिखसम्म लागु हुनेछ ।
अमेरिकास्थित नेपाली महावाणिज्य दुतावास न्युयोर्कले नोभल कोरोना रोगको रोकथाम नियन्त्रण उच्चस्तरीय समन्वय समितिले गरेको महत्वपुर्ण निर्णयहरु सबैका जानकारीको लागि सार्वजनिक गरेको हो । न्युयोर्कको नेपाली कन्सुलेटले जारी गरेको पत्र अनुसार कोरोना रोगको रोकथाम नियन्त्रण उच्चस्तरीय समितिले गरेको निर्णयहरुमा तेस्रो मुलुकका नागरिकलाई स्थलमार्गबाट प्रवेश निषेध गरिएको छ । सो प्रतिबन्ध मार्च १४ राती १२ बजेदेखि अप्रिल महिनाको ३० सम्म लागु हुने जनाइएको छ । त्यस्तै नेपालबाटै दिइदै आएको अनअराइभल भिसापनि स्थगित गरिएको छ । सो अन अराइभल भिषापनि मार्च १४ देखि अप्रिल ३० सम्मै बन्द हुनेछ । त्यसै गरी पहिलेनै नेपालको भिषा लिइसकेको विदेशी नागरिकले पनि सात दिन भित्रको चिकित्सकले प्रमाणित गरेको कोरोना नभएको प्रमाणपत्र पेश गर्नुपर्नेछ । सात दिन भन्नाले नेपाल पुग्ने समय सहितको जनाउछ । अति जरुरी कामले नेपाल जानुपर्ने भए विदेशी नागरिकले सम्बन्धीत देश स्थित नेपाली नियोगबाट नेपाल आइपुग्ने मितिभन्दा सात दिनभित्रको कोरोना नभएको प्रमाणपत्र सहित भिषा आवेदन दिनुपर्नेछ । मार्च १४ पश्चात नेपाल प्रवेश गर्ने विदेशीले १४ दिन आफ्नो होटेलमा अनिवार्य सेल्फ क्वारेन्टाइनमा बस्नुपर्नेछ ।


गैर आवासीय नेपाली नागरिककोपनि अन अराइभल भिषापनि बन्द
त्यसैगरि गैर आवासीय नेपालीका हकमा उनीहरुलाई गैर आवासीय नेपाली प्रमाणपत्रको आधारमा विमानस्थलमा दिंइदै आएको अनअराइभल भिषा सुविधा स्थगित गरिएको छ । उनीहरुलेपनि अब अत्यावस्यक कामका लागि नेपाल जानु पर्ने भएमा कोरोना नभएको प्रमाणपत्र सहित सम्बन्धीत मुलुकको नेपाली नियोगमा भिषा आवेदन दिनुपर्नेछ । उनीहरुलेपनि नेपालमा आफन्तको घरमा १४ दिनसम्म क्वारेन्टाइनमा बस्नु पर्नेछ । सो नियमपनि मार्च १४ देखि अप्रिल ३० सम्म लागु हुने जनाइएको छ । १४ दिन क्वारेन्टाइनमा बस्नुपर्ने नियम विदेशबाट फर्किने नेपाली नागरिकको हकमापनि लागु हुनेछ ।
कुटनीतिक तथा अफिसियल भिषा प्राप्त विदेशीहरुलेपनि नेपाल प्रवेश गर्दा वा बाहिर गइ फेरी नेपाल प्रवेश गर्दा १४ दिन क्वारेन्टाइनमा बस्नुपर्नेछ । सो नियम व्यवसायिक, कामदार तथा अध्ययन भिषा प्राप्त गरेका विदेशीहरुको हकमापनि लागु हुनेछ । सेल्फ क्वारेन्टाइन तथा होम क्वारेन्टाइनमा बसेकाहरुको अनुगमन स्थानीय सरकारी अधिकारीहरुले स्थानीय स्वास्थ्य संस्थाको सहयोगमा गर्ने जनाइएको छ ।
त्यसैगरी विदेशमा रहने सबै नेपालीलाई अत्यावस्यक काम बाहेकका अवस्थामा यात्रा नगर्न र सावधानी अपनाउनपनि अनुरोध गरिएको छ । न्युयोर्कस्थित नेपाली महावाणिज्य दुतावासबाट जारी उच्च स्तरीय समन्वय समितिको पत्रमा कुनै सभा सम्मेलन तथा भोज भतेर नगर्न तथा अनावस्यक सार्वजनिक यतायातमा यात्रा नगर्नपनि अनुरोध गरिएको छ ।


२ चैत्र २०७६, आईतवार २१:२९ मा प्रकाशित