न्युयोर्कमा २४ घण्टामा मृतकको संख्या चार गुणा नेपालीहरु धेरै बस्ने न्युयोर्कको क्वीन्समा मात्रै ११ सय बिरामी

दूरबिन नेपाल     ७ चैत्र २०७६, शुक्रबार ०२:१५    

Anil Baral Real Estate

दूरबिन नेपाल, न्युयोर्क

न्युयोर्कमा कोरोना भाइरसबाट मृतकको संख्या ह्वात्तै बढेको छ । पछिल्लो अपडेट अनुसार न्युयोर्कमा कोरोना भाइरसका कारण ज्यान गुमाउनेको संख्या ४२ पुगेको वल्र्ड ओ मिटर डट इन्फोले जनाएको छ । सो वेव साइडका अनुसार न्युयोर्कमा अहिलेसम्म पाँच हजार सात सय ११ बिरामी छन । विहिवारमात्र तीन सय ४४ जना नयाँ बिरामी थपीएका छन । विहिवार साँझसम्म न्युयोर्क मेयर कार्यालयले भने एकै दिन १५ जना भन्दा धेरैको ज्यान गएको जनाएको थियो । न्युयोर्कमा बुधबार साँझसम्म कोभिड १९ बाट मर्नेहरुको संख्या ११ बताइएको थियो तर जोन हप्किन्स विश्वविद्यालयले गरेको अपडेट अनुसार न्युयोर्कमा मृतकको संख्या ३४ बताइएको छ ।

सो विश्वविद्यालयका अनुसार न्युयोर्कमा संक्रमितको संख्यापनि पांच हजार तीन सय ६५ रहेको छ । न्युयोर्कको मेयर कार्यालयले जनाए अनुसार विहिवार साँझसम्म न्युयोर्कका पाँचवटै बोरोहरुमा कोरोनको संक्रमण अत्यधिक फैलिएको छ । न्युयोर्कको सबैभन्दा धेरै प्रभावित ब्रुकलिनमा मात्रै ११ सय ९५ जना संक्रमित भएका छन भने क्वीन्समा एक हजार ४२ बिरामी भेटिएका छन । त्यसैगरि म्यानहाटनमा एक हजार ३८ जनामा कोरोनाको संक्रमण देखिएको छ । त्यसै गरी ब्रङ्समा चार सय ९६ जना र स्टेटन आइल्याण्डमा एक सय ७९ जना कोरोनाका विरामी रहेका छन ।

नेपालीहरुको अत्यधिक बसोबास रहेको क्वीन्समा हजार बढी बिरामी

न्युयोर्कको क्वीन्स नेपालीहरुको अत्यधिक बसोबास भएको क्षेत्र हो । सो क्षेत्रमा पनि कोरोनाका बिरामीहरु एक हजार ४२ जना रहेका छन । अहिले सम्म कुनैपनि नेपालीलाई कोरोना भाइरसले संक्रमित बनाएको बाहिर आएको छैन । तर कुनैपनि बिरामीको नाम सार्वजनिक नगरिने हुंदा नेपालीहरु संक्रमित नै नभएको भन्ने ठम्याउन कठिन छ । २२ लाख जनसंख्या भएको क्वीन्समा धेरै दक्षिण एशीयाली मुलका मानिसहरु बसोबास गर्दछन ।

विहिवार नै नियमित जानकारी गराउंदै न्युयोर्कका मेयर बिल डे ब्लाजिओले अवस्था झन गम्भीर बन्दै गएकोले संघीय सरकारको सहयोग आवस्यक रहेको बताएका थिए । केहि दिन अघि मेयर ब्लाजिओले न्युयोर्कमा कोरोना भाइरसको फैलावट रोक्न पुरै सीटीलाई लकडाउन अर्थात सेल्फ सेल्टर घोषणा गर्न गभर्नर एण्ड्रु कुमोलाइ आग्रह गरेका थिए । तर गभर्नर कुमोले पुरै सिटीलाइ नै लकडाउन गर्दा अत्यावस्यक सेवा प्रदान गर्न कठिन हुने भन्दै मेयरको प्रस्ताव अस्वीकार गरेका थिए ।

विश्वभरी आतंक मच्चाइरहेको कोरोना भाइरसबाट लाग्ने रोग कोभिड १९ का बिरामीहरु न्युयोर्क तिब्र गतिमा बढिरहेका छन । न्युयोर्क अघोषित लकडाउन जस्तै छ । न्युयोर्कका रेल स्टेशनहरुमा मानिसहरु निकै कममात्र छन । मानिसहरु जमघट हुने स्थानहरु पनि सुनसान प्राय देखिन्छन । कोरोना भाइरसबाट विहिवार सम्म अमेरिकामा १४ हजार दुई सय ९९ संक्रमित भएका छन भने मृतकको संख्या दुइसय १८ पुगीसकेको छ । विश्वभरी एक सय ६० मलुकमा अहिलेसम्म कोरोना भाइरसका दुई लाख ४२ हजार सात सय २६ जना बिरामी छन भने ती मध्ये नौ हजार आठ सय ७० जनाको मृत्यु भइसकेको छ ।


७ चैत्र २०७६, शुक्रबार ०२:१५ मा प्रकाशित