ट्रम्पद्वारा डिभी लोटरी, ग्रीन कार्ड र  कामदार भिसामा रोक

जाङ्गबु शेर्पा     ८ असार २०७७, सोमबार २३:२९    

Anil Baral Real Estate

 जाङ्गबु शेर्पा


अमेरिका । सर्वेक्षणहरूले आँउदो नोभेम्बरमा हुने राष्ट्रपति निर्वाचनमा अमेरिकी राष्ट्रपति डोनाल्ड ट्रम्पले जित्ने सम्भावना कमजोर हुँदै गएको देखाइरहेका बेला आप्रवासी प्रति अनुदार पक्षको मत आकर्षित गर्न चर्को भाषण र अनुदार कदम उठाएका छन् । ट्रम्पले भर्खरै आगामी डिसेम्बरसम्मका लागि  विभिन्न श्रेणीका विदेशी कामदार भिसा,
रोजगार र परिवारमा आधारित ग्रिनकार्डमा समेत रोक लगाएका छन् । 

आप्रवासीहरू माथि कडारूपमा प्रस्तुत हुँदै आएका राष्ट्रपति ट्रम्पले आप्रावासी भिसामा थप कडाइ गर्न कार्यकारी निर्देशन जारी गरेका हुन् । ट्रम्प प्रशासनले सबै श्रेणीका कामदारका लागि प्रदान गरिदै आएको भिसामा पुनर्संरचना गरिने पनि बताएको छ । 

चुनाव लक्षित कदम भए पनि कोरना भाइरसको महामारी अर्थात कोभिड–१९ को प्रकोपसँगै अमेरिकामा वृद्धि भएको बेरोजगारीका कारण यस्ता नयाँ नियमहरू जारी गर्नु परेको ट्रम्प प्रशासनको जिकिर छ । 

नयाँ नियमले एच वान बी, एच फोर र एल भिसाका साथमा जे र एच टुबी भिसामा समेत रोक लगाइएको छ । तर स्वास्थ्य र कृषि क्षेत्रमा काम गर्न आउने विदेशी कामदारको निम्ति भने छुट दिइएको छ ।  यसबाट ५ लाखभन्दा वढी विदेशी कामदार प्रत्यक्ष प्रभावित हुनेछन् । यसबाट अमेरिकामा सूचना प्रविधि र  प्राविधिक क्षेत्रमा रहेका कम्पनीहरु समेत प्रभावित बन्ने छन् । 

राष्ट्रपति ट्रम्पले रोजगार र परिवारमा आधारित ग्रिनकार्डलाई समेत यो वर्ष डिसेम्बरसम्मका लागि  लम्ब्याइदिएका छन् ।  अब ग्रिनकार्डधारीले परिवारमा आधारित ग्रिनकार्डमा डिसेम्बरको अन्त्यसम्म परिवारका सदस्यहरूलाई अमेरिका ल्याउन पाउने छैनन् । रोजगारमा आधारित ग्रिनकार्डमा समेत अमेरिका आउन पाइने छैन । सन् २०२० को डिभी लोटरीमा समेत अब कोही अमेरिका आउन पाउनेछैनन् । तर यो नियम अमेरिकी नागरिकताको हकमा भने लागू हुने छैन । 

अझ अनुदार पक्ष के छ भने असाइलम अर्थात शरण आवेदनमा समेत योग्य नहुनेले दुरुपयोग गरेको जनाउदै कुनै पनि असाइलमको केश पेन्डिङ रहेको एक वर्षको अवधिमा काम गर्ने अनुमति अर्थात वर्क परमिट नदिने उल्लेख गरेको छ । यसले हजारौँ ब्यक्तिहरू रोजगारीको अवसरबाट विमुख हुने छन् ।


८ असार २०७७, सोमबार २३:२९ मा प्रकाशित