स्वर्गीय पत्रकार बानियाँको परिवारलाई इञ्जाले तत्कालै एक लाख रुपैंयाँ सहयोग गर्ने

दूरबिन नेपाल     ३० श्रावण २०७७, शुक्रबार ०२:२३    

Anil Baral Real Estate

दूरबिन नेपाल, अमेरिका
नेपाली पत्रकारहरुको अन्तर्राष्ट्रिय सञ्जाल इञ्जाले केहि दिनअघि दिवंगत भएका पत्रकार बलराम बानियाँको परिवारलाई १ लाख रुपैंयाँ सहयोग दिने घोषणा गरेको छ । पत्रकारहरुका समस्यामा सदैव चासो राख्दै आएको इञ्जाले स्वर्गीय पत्रकार बानियाँको अन्त्येष्टि र काज किरियामा परिवारलाई सहयोग पुगोस भनी तत्कालै आफ्नो आपतकालिन कोषवाट १ लाख रुपैयाँ दिने निर्णय गरेको इञ्जाद्धारा जारी विज्ञप्तिमा जनाइएको छ ।
इञ्जाले कान्तिपुर राष्ट्रिय दैनिकसंग आवद्ध वरिष्ठ पत्रकार बलराम बानियाँको असामयिक निधनप्रति गहिरो दुख व्यक्त गर्दै शोक सन्तप्त परिवारप्रति हार्दिक समवेदना समेत व्यक्त गरेको छ । वरिष्ठ पत्रकार बानियाँको कलम सदैव प्रजातन्त्रको संरक्षण र सुशासनका पक्षमा चलेको उल्लेख गर्दै इञ्जाले आफ्नो शोक विज्ञप्तिमा उनको निधनले नेपाली पत्रकारितामा अपुरणीय क्षति पुगेको बताएको छ । स्वर्गीय पत्रकार बानियाँको निधनको कारण अझै पनि प्रष्ट हुन नसकिरहेको अवस्थामा यस सम्बन्धमा आवश्यक अनुसन्धान हुनुपर्ने माग समेत गरेको छ । स्वर्गीय बानियाँको परिवारलाई सहयोग गर्न पनि नेपाल सरकार, पत्रकारिता सम्वद्ध संस्थाहरु तथा शुभेच्छुकहरुलाई समेत अनुरोध गरेको छ ।

नेजाद्वारा बानियाँको निधनमा शोक विज्ञप्ति जारी

यसैगरी केही दिन अघि मृत्यु भएका नेपाल पत्रकार महासंघका पूर्व सचिव बलराम बानियाँको निधनप्रति नेपाल अमेरिका पत्रकार संघ (नेजा)ले शोक विज्ञप्ति जारी गरेको छ । बानियाँको निधनमा उनीप्रति हार्दिक श्रदाञ्जली अपर्ण गर्दै शोक सन्तप्त परिवारजनमा हार्दिक समवेदना प्रकट गरेको जनाइएको छ । विज्ञप्तिमा कान्तिपुर पब्लिकेशनद्वारा प्रकाशित हुने कान्तिपुर दैनिकमा सहायक सम्पादकको जिम्मेवारीमा रहेका बानियाँले पत्रकारितामा ३ दशक बढी सक्रिय योगदान दिएको र पत्रकारिता मार्फत लोकतन्त्र, मानवअधिकार, सूचनाको अधिकार, स्वतन्त्रता र विधिको शासनका लागि भूमिका निभाएको स्मरण गरिएको छ ।


३० श्रावण २०७७, शुक्रबार ०२:२३ मा प्रकाशित