काठमाडौं । संस्कृति, पर्यटन तथा नागरिक उड्डयनमन्त्री प्रेम आलेले गौतमबुद्ध अन्तर्राष्ट्रिय विमानस्थलमा चाँडै उडान सुरु हुने बताएका छन्।
शनिबार विमानस्थलको अनुगमनमा गएका मन्त्री आलेले पछिल्लो केही दिनयतादेखि तराईमा लागेको तुवालो तथा मौसमको खराबीका कारण क्यालिब्रेशन फ्लाइट हुन नसकेको बताउँदै मौसममा सुधार आउनेबित्तिकै गौतमबुद्ध अन्तर्राष्ट्रिय विमानस्थलमा ‘क्यालिब्रेशन फ्लाइट’ हुने उनले जानकारी दिए। ‘क्यालिब्रेसन फ्लाइटका लागि सम्पूर्ण तयारी पूरा भइसकेको छ’, मन्त्री आलेले भने, ‘मौसममा सुधार भए क्यालिब्रेशन फ्लाइट गर्छौँ।’
मन्त्री आलेले विमानस्थलमा जडान गर्नुपर्ने थप नयाँ उपकरण तथा निर्माणका क्रममा रहेका भौतिक संरचना चाँडो निर्माण सम्पन्न गर्नसमेत निर्देशन दिएका छन्। यसैगरी उनले उक्त विमानस्थलको धावनमार्ग, कन्ट्रोल टावर, यात्रु आवागमन तथा प्रस्थान कक्षको समेत निरीक्षण गरेका थिए।
नेपाल नागरिक उड्डयन प्राधिकरणका महानिर्देशक राजकुमार क्षेत्रीले गौतमबुद्ध अन्तर्राष्ट्रिय विमानस्थलमा थाइल्याण्डको एरोथाइको प्राविधिक टोलीले क्यालिब्रेसन फ्लाइट गर्ने तयारी भइरहेको बताए।
प्रतिक्रिया लेख्नुहोस्:-