बतासलाई कारवाही प्रधानमन्त्री देउवाको साथ र समर्थन छ : पर्यटन मन्त्री आले

काठमाडौं । संस्कृति पर्यटन तथा नागरिक उड्डयन मन्त्री प्रेमबहादुर आलेले नारायणहिटी संग्रहालय प्रकरणमा प्रधानमन्त्री शेरबहादुर देउवाको साथ र समर्थन रहेको दावी गरेका छन् । उनले नेकपा ( एमाले) का अध्यक्ष केपी शर्मा ओलीले पनि यसमा समर्थन गरेको उनको बताए ।

मन्त्रालयमा आज आयोजित पत्रकार सम्मेलनमा उनले नारायणहिटीको जग्गा कौडीको भाउमा मिलेमतोमा बतास समूहलाई दिने कार्य अत्यन्तै खेदजनक रहेको उल्लेख गर्दै आफूले कारवाही गरेरै छोड्ने दृढतासमेत ब्यक्त गरे ।

प्रधानमन्त्री देउवा र पूर्वप्रधानमन्त्री ओलीको समेत बतास समूहसँग साँठगाँठ रहेको चर्चाबारे पत्रकारले सोधेको प्रश्नमा आलेले भने, ‘यो गलत हो । मलाई प्रधानमन्त्री देउवाले नै यसमा एक्सन लिएकोमा धन्यवाद दिनुभएको छ । एमाले अध्यक्ष ओलीले आफूले बतासलाई नचिनेको यसमा आफ्नो नाम नमुछ्न भन्नुभएको छ । उहाँहरु दुवैको सहमति छ । मलाई कसैले पनि रोकटोक गर्न सक्नुहुन्न ।’

नारायणहिटी जग्गा भाडा प्रकरणबारे अनेक अड्कलबाजी भइरहेका बेला मन्त्री आलेले आफू पछाडि नहट्ने दृढता ब्यक्त गरेसँगै यसमा मिलिभगत गरेकाहरु कारबाहीको भागीदार बन्ने पक्काजस्तै भएको छ ।