काठमाडौं । पार्टीको चौधौं महाधिवेशमा संस्थापनइतर पक्षबाट सर्बसम्मत सभापतिको उम्मेदवार बन्न नपाएपछि पार्टी राजनीति छोड्ने बताएका नेपाली कांग्रेसका वरिष्ठ नेता रामचन्द्र पौडेल फेरि पार्टीको काममा सहभागी हुन थोलेका छन् । बुधबार तनहुँमा आयोजित कार्यक्रममा विगतमा कांग्रेसमा अन्तर्घात मौलाए पनि अब भने अन्तरघातलाई प्रश्रय दिन नहुने बताएका छन् ।
नेपाली कांग्रेस तनहुँ क्षेत्र नं १ डुम्रेमा आयोजित पदस्थापन कार्यक्रमलाई सम्बोधन गर्दै वरिष्ठ नेता पौडेलले पार्टीको १४औँ महाधिवेशन सम्पन्न भएर नयाँ नेतृत्व आइसकेकाले अब एकजुट भएर अगाडि बढ्नुको विकल्प नभएको बताए ।
‘पार्टीको अधिवेशन सकिएको छ, हिजो जे जसरी चुनाव लडे पनि त्यो आन्तरिक चुनाव थियो, चुनावलाई लिएर अन्तरघातलाई प्रश्रय दिनुहुँदैन’, उनले भने, ‘कांग्रेस एकढिक्का भएर आगामी आम निर्वाचनमा जानुपर्छ ।’ वरिष्ठ नेता पौडेलले विगतका तीतामीठा अनुभवलाई बिर्सिएर प्रतिपक्षसँग एकजुट भएर लड्नुपर्ने विकल्प नभएको बताए ।
वरिष्ठ नेता पौडेलले आफू कहिल्यै पनि पदका लागि आन्दोलन नगरेको उल्लेख गर्दै भने, ‘केपी ओलीविरुद्धको आन्दोलनको नेतृत्व गर्दै गर्दा मलाई प्रचण्डले राष्ट्रपति दिने भयो भनेर पनि अफवाह फैलाए, म पदका लागि आन्दोलन गर्ने मान्छे होइन ।’
प्रतिक्रिया लेख्नुहोस्:-