मध्यरातिदेखि अवरुद्ध नारायणगढ– मुग्लिन सडकखण्ड अझै खुल्न सकेन

काठमाडौं । सुख्खा पहिरो खसेर मध्यरातिदेखि अवरुद्ध नारायणगढ मुग्लिन सडकखण्ड खुल्न समय लाग्ने भएको छ । कालिखोलामा सुख्खा पहिरो खसेपछि सडक अवरुद्ध भएको थियो ।

प्रहरीले दिएको जानकारी अनुसार पहिरो गएका कारण सयौं यात्रु बीच बाटोमै अलपत्र परेका छन् । बिहान ४ बजेदेखि पहिरो हटाउने काम भइरहेको भएपनि ठूलो पहिरो खसेकाले बाटो खुल्न भने समय लाग्ने प्रहरीले जानकारी दिएको छ। पहिराका कारण नारायणगढ–मुग्लिन सडकखण्ड भएर चल्ने सवारी साधन रोकिएका छन् ।

यो सडकखण्डमा पहिलो खसेर समयसमयमा सडक अवरुद्ध हुँदै आएको छ । यसअघि साँघुरो रहेको यस सडकखण्डलाई फराकिलो बनाइएपनि खोल्साखोल्सी धेरै भएका कारण हिउँदमा समेत पहिरो जाने क्रम भने कम भएको छैन । दैनिक हजारौं गाडी ओहोर दोहोर गर्ने यस नाकाबाट लाखौं यात्रृहरु आवतजावत गर्ने गरका छन् ।