काठमाडौं । नेकपा (माओवादी केन्द्र ) आज बसेको बैठकले निर्वाचन प्रक्रिया महँगो भएकाले तीनै तहको चुनाव एकैपटक गर्नुपर्नेमा जोड दिएको छ।
शनिबार पार्टीको केन्द्रीय कार्यालय पेरिसडाँडामा बसेको बैठकपछि प्रवक्ता कृष्णबहादुर महराले तीनवटै तहको चुनाव सकेसम्म कम खर्चमा एकैपटक कसरी गर्न सकिन्छ ? भनेर छलफल भएको भएका बताए।
‘निर्वाचन आयोग, पत्रकार, बुद्धिजीवीहरूको रायअनुसार कानुनविद्हरूसँग छलफल गरेर निष्कर्षमा पुग्नुपर्छ। चुनावमा सकेसम्म कम खर्चमा एकैपटक गर्न उचित हुन्छ भन्ने हाम्रो कुरा हो। यो छलफल अझ पनि जारी नै छ।’
उनले संसदमा विचाराधीन रहेको अमेरिकी परियोजना एमसिसीबारे पार्टीले बनाएको कार्यदलको सुझावको आधारमा अघि बढ्नेसमेत बताए।
प्रवक्ता महराले भने, ‘एमसिसीको कुरा अलि चर्को ढंगले उठेको छ। त्यसमा हाम्रो पार्टीले एउटा कार्यदल बनाएको छ। त्यसको सुझाव लिएर आवश्यक परिमार्जन संशोधन गरेर अगाडि बढ्न सुझाव दिएपछि मात्रै परिमार्जनसहित अघि बढ्ने कुरामा छलफल हुन्छ।’ सत्तामा रहेका दलहरुबीच नै निर्वाचन र एमसीसी लगायतका अन्य केही विषयमा एकै धारणा छैन ।
पछिल्लो समय एमसीसीबारे संशोधन गरेर मात्रै संसदबाट अनुमोदन गर्नुपर्छ भन्ने धारणा माओवादी केन्द्र र समाजवादी पार्टीको आधिकारिक धारणा छ भने नेकपा मसाल कुनै पनि हालतमा एमसीसी पास गर्न नहुने अडानमा छ । नेपाली कांग्रेस मात्रै जस्ताको तस्तै एमसीसी तुरुन्तै अनुमोदन गर्ने पक्षमा छ ।
एमसीसीबारे अध्ययन गर्न सत्ता गठबन्धनले नेकपा समाजकादीका वरिष्ठ नेता तथा पूर्व प्रधानमन्त्री झलनाथ खनाल संयोजक रहेको समितिले पनि आफ्नै तरिकाले काम गरिरहेको छ । यसले प्रतिवेदन भने बुझाएको छैन ।
प्रतिक्रिया लेख्नुहोस्:-