सांसद चौधरी पक्राउ

काठमाडौं । प्रहरीले नागरिक उन्मुक्ति पार्टीका सांसद अरुणकुमार चौधरीलाई पक्राउ गरेको छ । प्रहरीका केन्द्रीय प्रवक्ता डिआइजी पोषराज पोखरेलले उनीलाई पक्राउ परेका जानकारी दिए ।

पोखरेलका अनुसार उनलाई अहिले कोहलपुरबाट कैलाली लगिँदै छ । आगजनी मुद्दामा कैलाली जिल्ला अदालतबाट करिब १० वर्षअघि चौधरीसहित तीनजनालाई जनही ६ महिना कैद फैसला भएको थियो ।

दोषी ठहर भएकामध्ये एकजनालाई प्रहरीले गत बुधबार टीकापुरबाट पक्राउ गरेपछि सांसद चौधरीसमेत फरारको सूचीमा रहेको सार्वजनिक भएको थियो । साबिक बलिया गाविस– ५ का महादेव बजगाईंले आफ्नो ट्रयाक्टरमा आगजनी गरेको भन्दै तीनजनाविरुद्ध दिएको जाहेरीका आधारमा प्रहरीले मुद्दा चलाएको थियो ।