काठमाडौं । नेपाली कांग्रेसका महामन्त्री गगन थापाले सरकारले स्थानीय तहको निर्वाचनको मिति घोषणा गरेपछि अब निर्वाचन टार्ने गरी भएका अनेकन बहस अब सकिएको बताएका छन्।
थापाले सामाजिक सञ्जालमार्फत सरकारले ३० वैशाखमा एकै चरणमा स्थानीय तहको निर्वाचन घोषणा गरेसँगै आशंका हटेको उल्लेख गरेका हुन् ।‘वैशाख ३० गते स्थानीय तहको निर्वाचन गर्ने सरकारको निर्णय उपयुक्त छ, संविधानको मर्म अनुरूप छ। स्थानीय तह रिक्त हुन्छ की भन्ने आशंका हटेको छ’, उनले लेखेका छन्।
‘अनि निर्वाचन टार्ने गरी भएका अनेकन बहस अब सकिएका छन्। सबैले सदैव हेक्का राख्नु पर्दछ, संविधान र लोकतन्त्रको मर्म विपरीत हिँड्ने छुट कसैलाई छैन’, थापाले भनेका छन्।
सत्ता गठबन्धनमा रहेका माओवादी केन्द्र र एकीकृत समाजवादीले स्थानीय तहको निर्वाचनभन्दा संघीय संसद र प्रदेशको निर्वाचन पहिला गर्ने भनेर प्रधानमन्त्री शेरबहादुर देउवालाई पटक –पटक प्रेशर दिएका थिए । थापाले त्यतिबेलै सरकारले संविधानले तोकिएकै समयमा स्थानीय तहको निर्वाचन हुनुपर्नेमा जोड दिएका थिए । सत्तारुढ दलबीच आ– आफ्नै स्वार्थ भएका कारण उनीहरु निर्वाचनबारे एकमत हुन सकेका थिएनन् ।
प्रतिक्रिया लेख्नुहोस्:-