काठमाडौं । पार्टी अध्यक्षमा राजेन्द्र लिङ्देनसँग पराजित भएपछि आफ्नो हार हुनुमा निर्मल निवासको हात रहेको सार्वजनिक अभिब्यक्ति दिँदै हिँडेका राष्ट्रिय प्रजातन्त्र पार्टीका पूर्वअध्यक्ष कमल थापाले आफू पार्टीबाट अलग भएको घोषणा गरेका छन् ।
उनले एक संक्षिप्त विज्ञप्ति जारी गर्दै पार्टीमा आफूले माग गरेका कुराहरु सुनवाइ हुने अवस्था नदेखिएपछि बाध्य भएर अप्रिय निर्णय लिएको उल्लेख गरेका छन् ।
थापाले विज्ञप्तिमा भनेका छन् ‘अत्यन्त भारी मन तथा पीडाबोधका साथ मैले राष्ट्रिय प्रजातन्त्र पार्टीबाट अलग हुने निर्णय गरेको छु । पार्टीभित्र देखा पर्न थालेको सैद्धान्तिक विचलन तथा गलत प्रवृत्तिलाई सुधार गरेर मेरो बाँकी कियाशील राजनीतिक जीवन पार्टीभित्रै बिताउने र पार्टीमै रमाउने उत्कट चाहना भएता पनि आफ्नो कुराको सुनवाई नहुने भएपछि मैले यो अप्रिय निर्णय लिन बाध्य भएको हुँ ।’
राप्रपामा रहँदा पार्टीका साथी, सहयोगी र शुभचिन्तकहरूबाट प्राप्त सहयोग, सद्भाव र स्नेहप्रति सदैव आभारी रहने थापाले बताएका छन् । राप्रपामा कसैसँग पनि वैरभाव नरहेको भन्दै उनले सबैको भलो होस् भन्ने कामनासमेत गरेका छन् ।
थापाले हिजो मात्रै आफ्नो पक्षको भेला आयोजना गरी स्थानीय चुनावको घोषणासम्म माग सुनवाइ नभए पार्टी छोड्ने सन्देश दिएका थिए । उनी नयाँ पार्टी गठनको तयारीमा रहेको बुझिएको छ ।
प्रतिक्रिया लेख्नुहोस्:-