काठमाडौं । एमसीसी परियोजनाको विरोधमा नेपालमा दिनहँु प्रदर्शन हुन थालेपछि काठमाडौंस्थित अमेरिकी दूतावासले शनिबार साँझ एक प्रेस विज्ञप्ति जारी गर्दै एमसिसी अनुमोदन गर्ने वा नगर्ने निर्णय केबल नेपालको सार्वभौम विषय भएको प्रष्ट पारेको हो ।
दूतावासले यस विषयमा कुनै हस्तक्षेप नगर्ने कुरा विज्ञप्तिमा प्रष्ट पारिएको छ। सत्तारुढ दलहरुबीच नै एमसीसीलाई हेर्ने विषयमा एकै धारणा छैन । नेपाली कांग्रेस जसरी पनि छिटो भन्दा छिटो संसदबाट अनुमोदन गराउने पक्षमा छ भने माओवादी केन्द्र र एकीकृत समाजवादी संशोधन बिना एमसीसी पास गर्न नहुने अडानमा छन् ।
अर्कोतिर सर्वसाधारण जनतासमेत एमसीसी संसदमा टेबल गर्नै दिन हुन्न भन्दै दिनहुँ सडक आन्दोलन गरिरहेका छन् । साना राजनीतिक दलहरुले समेत एमसीसी नेपालको हितमा नभएकोले तत्काल फिर्ता पठाउनुपर्ने भन्दै आन्दोलनमा होमिएका छन् ।
सडकमा आगजनी र तोडफोड हुन थालेपछि हिजोमात्र दूतावासले एमसीसीलाई लिएर शान्तिपूर्ण आन्दोलन उचित भए पनि हिंसा अश्वीकार्य रहेको बताएको थियो ।
उसले आज फेरि विज्ञप्ति नै निकालेर यस्तो उल्लेख गर्नुलाई अर्थपूर्ण रुपमा हेरिएको छ भने हिजोमात्रै चिनियाँ विदेश मन्त्रालयमा प्रवक्ताले अमेरिकाले नेपालमा जबरजस्ती कूटनीति गरेको आरोप लगाउँदै आफूले त्यसको सशक्त विरोध गर्ने बताएको थियो ।
प्रतिक्रिया लेख्नुहोस्:-