प्रतिनिधिसभाबाट एमसीसी पास हुनु स्वागतयोग्य कदम भएको वाणिज्य महासंघ भनाइ

काठमाडौं । हिजो (आइतबार) प्रतिनिधिसभाबाट अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) सम्झौता अनुमोदन भएकोमा नेपाल उद्योग वाणिज्य महासंघले स्वागत गरेको छ।

नेपाल सरकार र एमसीसीबीच सन् २०१७ मा भएको सम्झौता अनुसार विद्युत प्रसारण लाइन निर्माण र सडक मर्मतको काम संघीय संसदबाट सम्झौता अनुमोदन पश्चात शुरू हुने छ । सम्झौता अनुमोदन पश्चात अव यो परियोजना पूर्णरूपमा कार्यान्वयनको चरणमा जाने महासंघको विश्वास छ ।

सम्झौता कार्यान्वयन हुँदा महामारीपछि अर्थतन्त्रको पुनरूत्थानमा सहयोग पुग्नुका साथै दीर्घकालमा विद्युत निर्यात एवं प्रविधि हस्तान्तरणको समेत ढोका खुल्ने महासंघले जनाएको छ। एमसिसी अन्तर्गतका आयोजना सुरू भएको ५ वर्षभित्र सम्पन्न गर्नुपर्ने व्यवस्थाले विकास सुशासनका लागि समेत नमुना बन्न सक्नेछ । अब यसबाट प्रतिफल लिन सम्झौता कार्यान्वयनका लागि गठित एमसीएले तदारूकताका साथ काम गर्नुपर्छ ।

यसका लागि सरोकारवाला सबैले खबरदारी गर्नु पनि आवश्यक रहेको महासंघले जनाएको छ ।