काठमाडौं । मुटुसम्बन्धी नेपालको एक मात्र सरकारी अस्पताल शहीद गंगालाल राष्ट्रिय हृदय केन्द्रले नेपालमै पहिलोपटक ट्रान्सक्याथेट एओर्टिक भल्भ ट्रान्सप्लानटेसन (टाभी) प्रविधिबाट छाती नचिरीकन मुटुको सफल शल्यक्रिया सम्पन्न भएको जानकारी दिएको छ ।
केन्द्रका निर्देशक डा. चन्द्रमणि अधिकारीका अनुसार यही फागुन १६ गते सोमबार एक ८० वर्षीया महिलाको सफलतापूर्वक शल्यक्रिया सम्पन्न गरिएको र शुक्रबार डिस्चार्ज गरी घर पठाउन सफल भएको बताए ।
डा. अधिकारीका अनुसार यस उपचार पद्दतिमा तिघ्राको धमनी फिमोरल आर्टरीबाट एक विशेष किसिमबाट निर्मित तार अर्थात् क्याथेटरद्वारा मानवनिर्मित भल्भ मुटुभित्र छिराई रोग भएको एओर्टिक भल्भको स्थानमा प्रत्यारोपण गरिन्छ ।
यसरी प्रत्यारोपण भएको भल्भले तुरुन्तै काम सुरु गर्ने हुँदा बिरामीलाई चाँडै नै आराम महसुस हुने र बिरामीलाई बेहोस गरी छाती र मुटु चिरी शल्यक्रिया गर्नु नपर्ने भएकोले जटिलताहरु न्यून हुने र बिरामीलाई चाँडै डिस्चार्ज गर्न सकिने हुन्छ ।
प्रतिक्रिया लेख्नुहोस्:-