प्रधानमन्त्री देउवा नयाँ खिम्ती सबस्टेसन उद्घाटन गर्न रामेछाप जाँदै

काठमाडौं । प्रधानमन्त्री शेरबहादुर देउवाले आज ( शनिबार) रामेछापको साँखेमा निर्माणाधीन नयाँ खिम्ती २२० १३२ केभी सबस्टेसनको उद्घाटन गर्ने कार्यक्रम रहेको छ । माथिल्लो तामाकोसी हाइड्रोपावर लिमिटेडद्वारा कार्यान्वयन गरिएको राष्ट्रिय गौरवको माथिल्लो तामाकोसी जलविद्युत् परियोजनाअन्तर्गत निर्मित उक्त सबस्टेसन उद्घाटन गर्न देउवा जान लागेका हुन् ।

तामाकोसी, लिखु र गर्ज्याङ करिडोरमा रहेका जलविद्युत् आयोजना यो सबस्टेसन र प्रसारण लाइनमार्फत राष्ट्रिय प्रणालीमा जोडिनेछन् । ती करिडोरमा बन्ने आयोजनाको बिजुली प्रसारण र वितरणका लागि यो सबस्टेसन निकै महत्त्वपूर्ण मानिएको छ ।

‘माथिल्लो तामाकोसीको ४५६ मेगावाटसहित अरू निजी क्षेत्रबाट सञ्चालित आयोजनाको समेत गरेर करिब १ हजार मेगावाट बिजुली यो सबस्टेसनबाट राष्ट्रिय प्रणालीमा जानेछ,’ माथिल्लो तामाकोसी हाइड्रोपावर लिमिटेडका प्रवक्ता गणेश न्यौपानेले भने ।