काठमाडौं । भारत भ्रमणको दोस्रो दिन आज (शनिबार) प्रधानमन्त्री शेरबहादुर देउवाले नेपालमा विदेशी लगानीको वातावरण सहज बनाउन आफू सधैँ तयार रहेको बताएका छन् । कन्फिडरेसन अफ इन्डियन इन्डिष्ट्रिज (सिआईआई) ले नयाँ दिल्लीमा आयोजना गरेको कार्यक्रममा देउवाले कुनै पनि मुलुक सरकार र निजी क्षेत्रको सहकार्य सहकार्यविना समृद्ध नहुने बताउँदै त्यसका लागि वातावरण बनाउने जिकिर गरेका हुन् ।
सिआईआई भारतमा महासंघको साझेदार संस्था हो । भारतीय प्रधानमन्त्री नरेन्द्र मोदीसँग भ्रमणका क्रममा भएको सम्झौताले विद्युत् आदान प्रदान र रेल सेवा सञ्चालनमा सहयोग पुग्ने उनले बताए ।
कार्यक्रममा नेपालमा भारतीय लगानी बढाउन र भारततर्फको निर्यात सहजीकरणका लागि सरकार र निजी क्षेत्र दुवैले भारतसँग आग्रह गरेका छन् । कार्यक्रममा महासङ्घ अध्यक्ष शेखर गोल्छाले जलविद्युत, पर्यटन, उत्पादनमूलक क्षेत्र र सूचना प्रविधि लगायतका सेवा क्षेत्रमा प्रशस्त सम्भावना रहेको बताए । उनले पर्यटन क्षेत्रमा सम्भावना बढ्दै गएको पनि बताए ।
कार्यक्रममा सिआईआईका अध्यक्ष टीभी नरेन्द्रनले नेपाल भारतीय लगानीकर्ताका लागि आकर्षक गन्तव्य भएको र नेपालमा लगानी बढाउन सहजीकरण गर्ने बताए । सिआईआईको उर्जा संयन्त्र नेपालमा लगानी बढाउन सहकार्य गर्ने पनि उनको भनाइ थियो । कृषिजन्य वस्तुको निर्यातमा गुणस्तरीय कायम गर्न पनि भारतले सहयोग गर्न सक्ने उनले बताए ।
प्रतिक्रिया लेख्नुहोस्:-