दूरबिन संवाददाता ।अमेरिका अप्रिल १३ ।
कोरोना भाइरस कोभिड १९ बाट संक्रमित भएर उपचारका लागि अस्पताल पुगेकाहरूलाई बचाउन प्रयास गरिरहेका विश्वभर दुई सय भन्दा बढि डाक्टर, नर्स लगायतका स्वास्थ्यकर्मीले पनि यहि भाइरसका कारण ज्यान गुमाएका छन् । इटलीमा बिरामी बचाउन खटिरहेका डाक्टर नर्सहरू विश्वमै सवै भन्दा बढि आहत भएको तथ्याङ्कले देखाउँछ । न्युजविकका अनुसार इटलीमा अहिलेसम्म १ सय २० जना डाक्टर नर्सको कोरोनाका कारण कारण ज्यान गइसकेको छ ।
इन्डोनेशियामा २४ जना डाक्टर–नर्सले ज्यान गुमाइसकेको उल्लेख छ । त्यस्तै बेलायतमा पनि बिरामी बचाउन खटिएका १९ जना डाक्टर–नर्सले आफ्नै ज्यान गुमाएका छन् । कोभिड १९ पहिलो पटक पुष्टि भएको चीनमा १३ जना डाक्टर–नर्सले उपचारका क्रममा संक्रमित भएर मृत्यु बरण गरे । स्पेनमा ११ जना, फ्रान्समा ५ जना र अमेरिकामा २ जना डाक्टर–नर्सले कोरोना भाइरसका कारण ज्यान गुमाएका छन् । चार दिन अगाडि अर्थात अप्रिल ९ तारिख सम्मको तथ्यांक अनुसार ग्रिस, पोल्याण्ड र पाकिस्तानमा पनि एक–एक जना डाक्टर नर्सले ज्यान गुमाइसकेका छन् ।
कतिपय अस्पतालहरूमा कोरोना संक्रमितको उपचारमा डाक्टर–नर्सले कोरोना संक्रमित बिरामीको चापका कारण निर्धारित समय भन्दा धेरै काम गर्न वाध्य हुनु परेको डाक्टर–नर्ससँग सम्बन्धित पेशागत संस्थाहरूले उल्लेख गरेका छन् । एक पछि अर्को बिरामीको मृत्यु हुने क्रम बढ्नु र आफ्नै ज्यान समेत जोखिममा राखेर धेरै समय काम गर्नुपर्दा डाक्टर–नर्सहरु समेत तनाव र चरम निराशामा गएको पनि उल्लेख गरिएको छ ।
यो समाचार तयार पार्दासम्म विश्वभर १९ खाल २४ हजार मानिस कोरोना भाइरसबाट संक्रमित भएका छन् । जसमध्ये एक लाख १९ हजार भन्दा बढि मानिसको यो भाइरसले ज्यान लिइसकेको छ । करिब ४ लाख ४५ हजार मानिस अस्पतालबाट उपचार पाएर घर फकिएका छन् । यिनै संक्रमितहरुलाई बचाउने प्रयासमा दुई सय भन्दा बढि डाक्टर–नर्सले आफ्नो ज्यान गुमाएका हुन् ।
स्रोत: न्युजविक र स्वास्थ्य पत्रपत्रिका
तस्विर: थाइल्याण्ड मेडिकल न्युजबाट
प्रतिक्रिया लेख्नुहोस्:-