नेप्लिज एशोसियशन अफ ह्युस्टन (एनएएच)को आयोजनामा टेक्ससको ह्युस्टनमा नेपालीहरुले नयाँ वर्ष २०७५ को अवसरमा सांस्कृतिक कार्यक्रम सहित शुभकामना रात्रीभोज गरेका छन्। हिलक्रफ्ट स्थित ताज हलमा शुक्रवार, अप्रिल १३ को साँझ सम्पन्न कार्यक्रममा कान्छा प्रोडक्शन र डिजे अनुपले एनएएचसंग सहकार्य गरेका थिए। स्थानीय कलाकारहरुले गीत, नृत्य तथा नेपालका बिभिन्न जात-जाती तथा सम्प्रदायका भेष-भूषा प्रदर्शन गरेर सहाभागीहरुलाई मनोरन्जन दिएका थिए।
नेपाली तथा अमेरिकन राष्ट्रियगानबाट शुरु भएको सांस्कृतिक कार्यक्रममा एनएएचका अध्यक्ष ज्योति घिमिरेले एनएएचले गत बर्ष गरेका सामाजिक गतिविधीहरुका बारेमा चर्चा गरेका थिए। एनएचको अगुवाईमा नेपालीहरुको आफ्नै पशुपति मन्दिर तथा सामुदायिक भवनको खरीद हुनु ह्युस्टनका नेपालीहरुको लागि निकै खुसी र गर्व लाग्ने विषय भएको बताउँदै उक्त कार्यमा संलग्न हुने सबै नेपाली समुदायका व्यक्तिहरुलाई अध्यक्ष घिमिरेले धन्यवाद ज्ञापन गरेका थिए।
प्रशान्ती पण्डितले कार्यक्रम संचालन गरेको कार्यक्रममा बालिकाद्वय काव्या नेपाल र खुसी खतिवडाले ‘शिरैमा शिरबन्दी कानैमा मेरो झुम्का, नाकैमा फूली मेरो आँखैमा गाजल’ बोलको गीतमा निकै सुन्दर नृत्य प्रस्तुत गरेर साँस्कृतिक कार्यक्रमको शुरुवात गरेका थिए। यसैगरी सुम्निमा गौतमले ‘सुर्के थैली खै’ र अनिशा पोखरेलले ‘लहनाले जुरायो कि, बहानाले भेट्टायो’ बोलको गीतमा निकै सुन्दर नृत्य प्रस्तुत गरेका थिए। स्थानीय कलाकारहरु कृति सापकोटा, आकृति रेग्मी, स्नेहा कुँवर, साई लामा, संजीब श्रेष्ठ लगाएतले गीत तथा नृत्य प्रस्तुत गरेर मनोरंजन दिएका थिए। कार्यक्रममा एनएएचका पदाधिकारी तथा सहभागीहरुको ‘कपल-एपियरेन्स’ पनि निकै रोचक देखिएको थियो।
तुलनात्मक रुपमा कम सहभागिता रहेको नयाँ बर्ष २०७५ साँझमा डिजे अनुपले १२ बजे पछि पनि सहभागीहरुलाई लोकप्रिय गीत बजाएर नचाएका थिए।
तस्वीर: सुजन पण्डित
प्रतिक्रिया लेख्नुहोस्:-