काठमाडौं । अर्थमन्त्री डा. प्रकाशशरण महतले अर्थतन्त्रमा रहेका अप्ठ्यारालाई निजी क्षेत्र र सरकार मिलेर समाधान गर्नुपर्ने बताएका छन् ।उनले सोमबार नेपाल उद्योग वाणिज्य महासंघका नवनिर्वाचित पदाधिकारीसँगको भेटवार्तामा यस्तो बताएका हुन् ।
राजनीतिक विषय र आर्थिक दायित्वबीच तादम्यता नहुँदा पनि समस्या सिर्जना भएको उनले बताए । बढ्दो साधारण खर्चले निम्त्याएको दायित्वलाई राजनीतिक क्षेत्रबाट आर्थिक स्रोतको पहिचान र परिचालन गरी सँगसँगै लैजानुपर्नेमा त्यसो हुन नसकेको महतको भनाइ छ ।
उद्योगी र बैंकहरुले एकअर्कालाई सहयोग गर्नुपर्नेमा महतले जोड दिए । ‘महासंघको नेतृत्व बैंकरको हातमा पुगेको छ, देशको अर्थ व्यवस्थाबारे जानकार हुनुहुन्छ, समाधान गर्ने पहल गरौं’ उनले भने ‘यो अप्ठ्यारोमा एकअर्कालाई सहयोग गर्ने समय हो । सहज अवस्थामा कसैले कसैलाई सहयोगको आवश्यकता पर्दैन, अप्ठ्यारो समयमै सहयोग गर्नुपर्छ ।’
अर्थतन्त्र सुधारका लागि राष्ट्र बैंकको नेतृत्वसँग औपचारिक र अनौपचारिक छलफल आफूले गरिरहेको बताए ।
प्रतिक्रिया लेख्नुहोस्:-