काठमाडौं । जनता समाजवादी पार्टी (जसपा) का संघीय परिषद् अध्यक्ष तथा पूर्वप्रधानमन्त्री डा. बाबुराम भट्टराईले आगामी बैशाख ३० गते हुने स्थानीय तहको निर्वाचनमा अहिले सत्ता गठबन्धनमा रहेका दलहरुबीच नै तालमेल हुने बताएका छन्।
उनले मंगलबार गोरखा जिल्लामा आयोजित चुनावी सभालाई सम्बोधन गर्दै आवश्यकता र औचित्यको आधारमा गठबन्धन दलभित्र नै चुनावी तालमेल हुने बताएका हुन्।
सत्तागठबन्धनका दलबीच महानगर र उपमहानगरको भागबन्डा करिब टुंगिएको र पोखरा एकीकृत समाजवादीलाई दिँदा कांग्रेसका कार्यकर्ताले विरोध गरेकाले महानगरको अन्तिम निर्णय आउन बाँकी रहेको उनले बताए। बाँकी स्थानीय तहमा पनि गठबन्धन दलभित्र नै चुनावी तालमेल हुने उनले बताए।
‘गठबन्धनका दलहरू स्थानीय निर्वाचनमा सँगै जाँदा राम्रो हुन्छ। गठबन्धनभन्दा बाहिरको दलसँग तालमेल हुँदै हुन्न त भन्न मिल्दैन तर नैतिक रूपले राम्रो हुँदैन। त्यसैले गठबन्धनबाहिर नजाने तर गठबन्धनभित्र चाहिँ जो जससँग मिल्न सक्छ, उनीहरूसँग आवश्यकता र औचित्यको आधारमा तालमेल हुन्छ,’ उनले भने। गबन्धन दलभन्दा बाहिरका दलसँग चुनावी तालमेलको सम्भावना अत्यन्तै न्यून रहेको उनको भनाइ छ।
प्रतिक्रिया लेख्नुहोस्:-