अमेरिकी राष्ट्रपति डोनल्ड ट्र्म्पले इरानसँग २०१५ मा गरिएको बहुदेशीय परमाणु सम्झौताबाट पछि हट्ने घोषणा गरेपछि सो सम्झौताको भविष्यका बारेमा अन्यौल उत्पन्न भएको छ। रसिया, चीन, बेलायत, फ्रान्स र जर्मनीले सम्झौतालाई निरन्तरता दिने प्रतिबद्धता व्यक्त गरेका छन्। सम्झौताको पक्षमा रहेका अमेरिकी मित्रशक्ति देशहरुको अनुरोधका बावजुद अमेरिकाले सो समझौताबाट बाहिरिने घोषणा गरेकोमा रुस, चीन, जर्मनी, फ्रान्स, बेलायत सहित
यूरोपेली संघ-(ईयू) का सबै राष्ट्रहरुले चिन्ता व्यक्त गरेकाछन्। साथै अमेरिकी राष्ट्रपतिले भनेजस्तो इयू र यसका सदस्यहरूका तर्फबाट इरान माथि कुनै प्रतिबन्धहरू नलगाउने समेत एक संयुक्त विज्ञप्ति मार्फत जानकारी गराएको छ। केही दिन पहिले मात्र फ्रान्सेली राष्ट्रपतिले अमेरिकी संसदको संयुक्त बैठकलाई सम्वोधन गर्दै अमेरिकालाई ईरानसंग भएको परमाणु सम्झौताको पक्षमा रहिरहन अनुरोध गरेका थिए। तर मित्र शक्तिहरुका सबैखाले सुझावको बेवास्ता गर्दै इरानसंगको सम्झौता अमेरिकी हित र विश्व शान्तिका पक्षमा नभएको र आफ्ना पूर्ववर्ती राष्ट्रपति ओवामाले त्रुटिपूर्ण परमाणु सम्झौता गरेर निकै गल्ति गरेको भन्ने गरेका ट्रम्पले अन्तत: सम्झौताबाट बाहिरिने घोषणासंगै इरान माथि थप आर्थिक प्रतिबन्ध लगाउने घोषणा समेत गरेका छन्।
जर्मनी सहित संयुक्त राष्ट्रसंघीय सुरक्षा परिषद्का पाँचै स्थायी सदस्यहरू अमेरिका, ब्रिटेन, फ्रान्स, चीन र रुसले सन् २०१५ मा इरानसँग परमाणु सम्झौता गरेका थिए।
समाचारहरुमा जनाइए अनुसार संयुक्त राष्ट्रसंघीय आणविक ऊर्जा निगरानीसम्बन्धी अन्तर्राष्ट्रिय संगठन (आइएईए) ले पनि इरानले समझौताका प्रवधानहरुलाई पूर्णरुपमा पालना गरिरहेकोले इरानसँग गरिएको परमाणु सम्झौताको पक्षमामा नै आफूलाई उभ्याएको छ।
परमाणु सम्झौताबाट अमेरिका अलग भएसंगै बाँकी देशहरुले इरानसंग व्यापारिक सम्बन्ध जारी नराखे इरानले सो सम्झौता परित्याग गर्ने इरानी सर्वोच्च नेता आयोतल्लाह अलि खामेनीले बताएका छन्। उनले ट्वीटरमा एक सन्देश राख्दै सम्झौताबाट अलग्गिने अमेरिकी निर्णयलाई ट्रम्पको गल्ती भनेका छन्।
प्रतिक्रिया लेख्नुहोस्:-