इजरेल स्थित अमेरिकी राजदूतावास आज एक समारोहकाबीच तेल-अभिभबाट जेरुसलेममा सारिएको छ। तर राजदूतावास सार्ने अमेरिकी निर्णले निम्त्याएको हिंसामा ४१ जना प्यालेष्टेनीको ज्यान गएको छ। पर्वेक्षकहरुले ४१ जना प्यालेस्टेनीको जीवन-मूल्यमा अमेरिकी राजदूतावास जेरुसलेम सारिनु निकै दुखद घटना भएको बताएका छन्।
जेरुसलेमलाई इजरेलको राजधानीको रुपमा अमेरिकाले दिएको मान्यताको प्यालेस्टिनीहरूले विरोध गर्दै आएका छन्। अमेरिकी राजदूतावास जेरुसलेम सर्नु ६ हप्ता अघि देखि गाजा क्षेत्रमा फैलिएको हिंसाले सयौंलाई अंग-भंग बनाएको छ भने हिजो भएको हिंसात्मक प्रदर्शनीमा इजरेली सेनाको गोली लागेर ४१ जनाको ज्यान गएको प्यालेष्टेनी प्रशासनले जनाएको समाचार माध्यमहरुले बताएका छन्।
७० बर्ष अघि आजैका दिन इजरेल राज्यको स्थापना भएको थियो। आफ्नो राजदूतावास जेरुसलेम सारिएको समारोहलाई एक भिडियो सन्देश पठाउँदै अमेरिकी राष्ट्रपति डोनल्ड ट्रम्पले भनेकाछन् “इजरेलको राजधानी जेरुसेलम भएको सत्यलाई सबैले स्वीकार्नु राम्रो हुने छ।” साथै उनले गाजाक्षेत्र लगाएत मध्यपूर्वमा शान्ति कायम राख्न समेत अपील गरेका छन्। राष्ट्रपति ट्रम्पले एक ट्वीटर सन्देश मार्फत पनि इजरेललाई बधाई दिएकाछन्। सरकारको प्रतिनिधीका रुपमा ट्रम्पकी छोरी इभान्का ट्रम्पले सो समारोहमा सहभागी भएकी थिइन्।
दूतावास सार्ने अमेरिकी निर्णयको इजरेल बाहेक कसैले स्वागत गरेका छैनन्। बरु यसले इजरेल-प्यालेस्टाइन सीमा गाजा-क्षेत्रमा हिंसा भड्काएको छ र मध्यपूर्वमा अशान्तिको पूनरागमन गराउने खतरा बढाएको छ। अमेरिकी सरकारले जेरुसलेमलाई इजरेली राजधानीको मान्यता दिएको घटनाले व्यापक अन्तर्राष्ट्रिय निन्दा पनि निम्त्याएको छ भने केही महिना पहिले संयुक्त राष्ट्रसंघमा भएको मतदानमा अमेरिकी निर्णयको पक्षमा मेक्सिको सहित जम्मा ९ देशले मात्र समर्थन गरेका थिए भने मित्रशक्ति राष्ट्रहरुले समेत अमेरिकी कदमको समर्थन गरेका थिएनन्।
तस्वीर:एफपी
प्रतिक्रिया लेख्नुहोस्:-