सानफ्रानसिस्को ।
अमेरिकाका लागि नेपाली राजदुत डाक्टर युवराज खतिवडा केही दिन देखि पश्चिम तटिय राज्य क्यालिफोर्नियामा विभिन्न कार्यक्रम र भेटघाटमा ब्यस्त भएका छन् । उनकै उपस्थितिमा क्यालिफोर्नियामा नेपाली पासपोर्ट–भिषा लगायतका काम हुँदै छ । यसको अतिरिक्त नेपाली समुदायसँग जोडिएका संघ संस्था र ब्यक्तिहरुसँग राजदुत खतिवडा छलफल र अन्तरक्रिया ब्यस्त भएकाछन् । लस एन्जलसका मेयर एरिक गर्सिटीसँग पनि राजदुत खतिवडाको भेटबार्ता भइसकेको छ । त्यस्तै सानफ्रानसिस्कोमा डेमोक्रेटिक पार्टीका प्रभावशाली सभासद रो खन्नासँग पनि राजदुतलाई भेटबार्ता गराउन बे एरियाका सामाजिक अगुवाहरुले पहल गरिरहेका छन् ।
अमेरिकामा नेपालीहरुको बाक्लो बस्ति रहेका क्षेत्रहरु मध्येका लस एन्जलस र सानफ्रानसिस्को वरपरका क्षेत्रलाई लक्षित गरि नेपाली राजदूतावासले घुम्ति कन्सुलर सेवा उपलब्ध गराएको छ । राहदानी नविकरण, अधिकृत वारेसनामा, गैर आवासीय नेपाली परिचय पत्र, कागजात प्रमाणिकरण, एकतर्फी यात्रा अनुमति पत्र, पर्यटक भिषा लगायतका कामहरु घुम्ति कन्सुलर सेवा शिविरमा उपलब्ध हुने भएको छ ।
नेपाली राजदुतावास, कन्सुलेट अफ नेपाल क्यालिफोर्निया र पशुपति फाउन्डेशनको संयुक्त आयोजनामा लस एन्जलस स्थित पशुपति फाण्डेशनमा जुन ४ र ५ तारिख कन्सुलर सेवा शिविर सन्चालन भइरहेको छ । त्यस्तै सानफ्रानसिस्कोमा नेपाली राजदुतावास, एनएएनसी र एनआरएनए क्यालिफोर्निया च्याप्टरको आयोजनामा ६ र ७ तारिख कन्सुलर सेवा शिविर सन्चालन हुने छ ।
कन्सुलर सेवा शिविरमा आउनेहरुका लागि सार्वजनिक गरिएको सूचनामा राखिएको राजदुतावासको अनलाईन लिंकमा फर्म भर्नु पर्ने हुन्छ । सानफ्रानसिस्को वरपरबाट मात्रै एकसय भन्दा बढिले अनलाइन फर्म भरिसकेको अनुमान छ । आयोजक पक्षका एक एनआरएनए अमेरिका क्यालिफोर्निया च्याप्टरका अध्यक्ष तथा नव निर्वाचित आइसीसी सदस्य सुरेन्द्र मल्ल भन्छन् “सेवा ग्राहीले आवश्यक प्रक्रिया पुरा गरेर, सबै डकुमेन्टहरु लिएर आएमा काम छिटो र समयमा नै हुनेछ ।”
कन्सुलर सेवाको अतिरिक्त राजदुतसँग विभिन्न कार्यक्रम पनि तय भएका छन् । राजदुत डाक्टर युवराज खतिवडासँग शनिवार साझ प्रोफेशनलहरुको संस्था जीएनपीएन र टुरिजम बोर्डले विज्ञहरुको प्रस्तुती र अन्तरक्रिया कार्यक्रम राखेको छ । त्यस्तै आइतवार सानफ्रानसिस्को बे एरियामा रहेका नेपाली मुलका ब्यबसायीहरुले राजदुतसँग अन्तरक्रियाको कार्यक्रम राख्ने प्रयास गरिरहेका छन् ।
तस्विर :रिशि ढकालको फेसबुक वालबाट
प्रतिक्रिया लेख्नुहोस्:-