काठमाडौं । अर्थ मन्त्रालयले बजेट निर्माण प्रक्रियामा नेपाल सरकारका जिम्मेवार पदाधिकारीबाहेक कसैको पनि सहभागिता नरहेको प्रष्टीकरण दिएको छ।
मन्त्रालयले एक प्रेस विज्ञप्ति जारी गर्दै असम्बन्धित व्यक्तिले बजेट सार्वजनिक गर्नु अघिल्लो राति करका दर हेरफेर गरेको भनेर आएका समाचारमा सत्यता नभएको दाबी गरेको हो।
‘माननीय अर्थ मन्त्री सामान्यतः सूचीकृत दैनिका औपचारिक कार्यक्रमबाहेक हरेक दिन विहान (७ः३०) बजे मन्त्रालय आउने र राति अबेरसम्म रही बजेटलाई पूर्णता दिन मन्त्रालयका अधिकारीहरुसँग निरन्तर छलफल गर्ने कार्यमा खट्नुभएको थियो।’ , विज्ञप्तिमा लेखिएको छ, जेठ १४ गते पनि माननीय मन्त्रीको नेतृत्वमा सचिव, सचिव (राजश्व ) र मन्त्रालयका सम्बन्धित महाशाखा प्रमुखहरु तथा भन्सार विभाग र आन्तरिक राजश्व विभागका महानिर्देशक समेतको सहभागितामा विषयहरु तयारी भएको र यस प्रक्रियामा तोकिएका जिम्मेवार पदाधिकारीबाहेक अरु कसैको सहभागिता नरहेको सबैमा जानकारी गराउँदछौं।’ सोमबारको अन्नपूर्ण पोस्टमा यस सम्बन्धी समाचार प्रकाशित भएपछि अर्थले आज साँझ नै विज्ञप्ति जारी गरेर प्रस्टीकरण दिएको हो ।
प्रतिक्रिया लेख्नुहोस्:-