विपक्षीको अवरोधपछि प्रतिनिधिसभा बैठक दुई दिन स्थगित

काठमाडौं । प्रधानमन्त्रीले बोलेको कुरालाई लिएर विपक्षी दलहरूले संसद कारण अवरुद्ध गरेपछि प्रतिनिधिसभा बैठक दुई दिनका लागि स्थगित गरिएको छ ।

प्रमुख प्रतिपक्षी एमाले, विपक्षी दलहरू रास्वपा र राप्रपाले प्रधानमन्त्री पुष्पकमल दाहाल प्रचण्डको अभिव्यक्तिमा आपत्ति जनाउँदै बुधबार दिउँसो ३ बजे बसेको प्रतिनिधिसभामा अवरोध गरेका थिए । विपक्षी दलको अवरोधपछि सभामुख देवराज घिमिरेले आधा घण्टाका लागि बैठक स्थगित गरेका थिए ।

विपक्षीहरूले प्रधानमन्त्रीले राष्ट्रहितविपरीत बोलेको, दिल्लीबाट सरकार बन्छ भन्ने अभिव्यक्ति दिँदा सारा नेपालीको शिर निहुँरिएको भन्दै राजीनामा माग्दै विरोध जनाएका थिए ।

बैठक स्थगित गरेर विपक्षी दलहरूसँग सहमतिको प्रयास गरे पनि कुरा नमिलेको भन्दै सभामुख घिमिरेले शुक्रबार ३ बजेसम्मका लागि बैठक स्थगित गरेका हुन् । विपक्षीको अवरोधले बैठक स्थगित भएसँगै मिटरब्याजसम्बन्धी अध्यादेश निष्क्रिय भएको छ ।