थपिए १६८ जना कोरोना संक्रमित, के यो चौथो लहरको संकेत हो ?

काठमाडौं । विगत केही दिनदेखि कोरोना संक्रमण बढिरहेको छ । आज सोमबार नेपालमा १६८ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार ३ हजार २० जनाको परीक्षणमा १६८ जनामा संक्रमण भएको हो ।

मन्त्रालयका अनुसार १ हजार ८३४ जनाको पीसीआर परीक्षणमा १२९ जना र १ हजार १८६ जनाको एन्टीजेन परीक्षणमा ३९ जना गरी १६८ जनामा संक्रमण पुष्टि भएको हो । त्यस्तै पछिल्लो २४ घण्टामा कोरोनाबाट कसैको पनि मृत्यु भएको छैन।

यससँगै कोरोना भाइरसको सक्रिय संक्रमितको संख्या ७७० पुगेको छ । त्यस्तै पछिल्लो २४ घण्टामा ३७ जना कोरोना संक्रमणमुक्त भएका छन् । कतिपयले यसलाई चौथो लहरको संकेतको रुपमा लिएपछि स्वास्थ्य मन्त्रालयले यसबारे केही औपचारिक बताएको छैन ।