सियाटल, अमेरिका, जुलाई २१,२०१८
नेपाल अमेरिका पत्रकार संघ (नेजा) को छैठौं अधिवेशन तथा बाह्रौं साधारण सभा अमेरिकी उत्तर-पश्चिमी राज्य वाशिंगटनको सियाटल शहरमा शुरु भएको छ। नेपाल पत्रकार महासंघका सभापति गोविन्द आचार्यको प्रमुख आतिथ्यतामा शुरु भएको उद्घाटन सत्र भर्खर शुरु भएको छ। साधारण र आजीवन सदस्य गरेर १३६ जना सदस्य भएको नेजाको अधिवेशनमा करीब ७० जना सदस्यहरुको सहभागिता रहेको आयोजकहरुले जनाएका छन्। नेजा अध्यक्ष भोला आचार्यको सभापतित्व एवं महासचिव तोया दहालद्वारा संचालित उद्घाटन सत्र आजै समापन हुने कार्यक्रम छ। कार्यक्रममा नेपाल सरकारका अवैतनिक महावाणिज्यदूत ऋषि ढकाल, वाणिज्यदूत एसी शेर्पा, एनआरएनए अमेरिकाका बरिष्ठ उपाध्यक्ष सुनिल साह, वाशिंगटन स्टेटका लागि एशिया प्रशान्त क्षेत्रीय मामिला सम्वन्धी आयुक्त मोहन गुरुंग, एनआरएनए आइसीसीका सदस्य बलराम थापा, नेजाका पूर्व अध्यक्षहरु गिरीश उपाध्याय, आंग छिरिंग शेर्पा र गौतम दहाल लगाएतका अतिथिहरुको उपस्थिति रहेको छ। भोली बिहानबाट नयाँ नेतृत्व चयनका लागि बन्द-सत्र सहित चुनावी प्रक्रिया शुरु हुने जानकारी निर्वाचन समितिको संयोजक तारा बरालले गराएका छन्।
प्रतिक्रिया लेख्नुहोस्:-