बाँसबारी क्लबलाई स्पार्क हेल्थ होम हस्पिटलको साथ

दूरबिन नेपाल     १५ माघ २०७५, मंगलवार १६:२४    

Anil Baral Real Estate

काठमाडौँ ।  ‘बी’ डिभिजन क्लब बाँसबारी क्लबलाई स्पार्क हेल्थ होम हस्पिटलले प्रायोजन गरेको छ । स्पार्क हस्पिटलले बाँसबारी क्लबलाई एक वर्षका लागि करीब रु आठ लाख बराबरको प्रायोजन गरेको हो ।

बाँसबारी क्लब र स्पार्क हेल्थ होम हस्पिटलबीच आज यहाँ आयोजित कार्यक्रममा सम्झौतापत्रमा हस्ताक्षर भएको छ । क्लबका अध्यक्ष प्रेम थापा र अस्पतालका निर्देशक रूपेश अधिकारीले सम्झौतापत्रमा हस्ताक्षर गर्नुभयो । क्लबका अध्यक्ष प्रेम थापाले स्पार्कको प्रायोजनले ‘बी’ डिभिजन लिग खेल्न क्लबलाई धेरै राहत दिएको बताउनुभयो ।

स्पार्कका निर्देशक रूपेश अधिकारीले बजेट सन्तुलनलाई हेर्दै ‘बी’ डिभिजन क्लबसँग गाँसिएको बताउनुभयो । “‘ए’ डिभिजन क्लबसँग जोडिन प्रयास गरेका थियौँ तर बजेटको सीमारेखा हेर्दा बाँसबारी छनोटमा परेको छ,” उहाँले भन्नुभयो ।

सो अवसरमा अखिल नेपाल फुटबल सङ्घ (एन्फा)का अध्यक्ष कर्माछिरिङ शेर्पाले ‘बी’ र ‘सी’ डिभिजनका क्लबलाई बलियो बनाउन एन्फा लागिरहेको बताउँदै बाँसबारीको प्रायोजनलाई सोहीअनुसार लिनुपर्ने बताउनुभयो । सम्झौतासँगै क्लबले स्पार्क हस्पिटल बाँसबारीको लोगो अङ्कित जर्सीको प्रयोग गर्नेछ । ‘बी’ डिभिजन लिग यही माघ २५ गतेदेखि शुरु हुँदैछ ।


१५ माघ २०७५, मंगलवार १६:२४ मा प्रकाशित