आज राति १२ बजे वेबसाइट डाउन हुने, सदस्य बन्ने अवधि नथपिने एनआरएनए अमेरिकाको आकस्मिक बैठक सम्पन्न

दूरबिन नेपाल     ४ फाल्गुन २०७५, शनिबार ०३:२३    

Anil Baral Real Estate

 फेब्रुअरी १५
सदस्यताका लागि समय नथप्ने पुरानै निर्णयलाई निरन्तरता दिँदै एनआरएनए अमेरिका कार्यसमितिको आकस्मिक बैठक सम्पन्न भएको छ । शुक्रवार साँझ बसेको बैठकमा सहभागी अधिकांशले समय थप्न नहुने पक्षमा आफ्नो मत राखेका थिए । प्रवक्ता विनोद कुमार तिवारीका अनुसार समय थप्नु पर्छ भनेर बैठकमा कसैले पनि अडान लिएनन् । प्राविधिक समस्या बारम्बार आएका कारण सदस्यता लिने समय अवधि थप्ने पक्षमा केही सदस्यहरू बोल्न सक्ने अनुमान गरिएको भए पनि बैठकमा कसैले त्यस विषयमा प्रस्ताव ल्याएनन् । केही सङ्घ संस्था र समुदायका अगुवाहरूले पनि समय अवधि नथप्न दबाब दिइरहेका र एनआरएनलाई सधैँ वद्नाम गर्न लागि पर्ने समूहलाई बल पुग्ने हुँदा समय थप गर्ने पक्षमा कोही नदेखिएको बैठकमा सहभागी एक सदस्यले बताए ।
आजै राती १२ बजे एनआरएनए अमेरिकाको वेबसाइट सदस्यता फर्म लिने स्थान निस्क्रिय बनाइने छ । छानबिन समिति र सुपरिवेक्षण समितिले काम सकेपछि मात्र वेबसाइटको सदस्यता दरखास्त दिने स्थान पुन खुला हुने छ ।
सरभरमा बारम्बार देखिएको कमजोरी र सदस्य बन्न चाहनेहरूलाई परेको समस्यालाई कसरी सम्बोधन गर्ने भन्ने विषयमा छलफल गर्न बोलाइएको बैठकमा वेबसाइट कमिटी र आइटी कमिटीमा माथि धेरै प्रश्नहरू आएका थिए । प्रवक्ता विनोद कुमार तिवारीका अनुसार पछिल्ला केही दिनमा सदस्यता लिन चाहनेहरूको बढ्दो चापले सरभरमा समस्या आएको आइटी टिमका सदस्यले कार्यसमितिलाई जानकारी गराए । आइटी टिम र वेबसाइट निर्माण समितिका सदस्यहरूले डोमिन प्रोभाइडर र सरभर प्रोभाइडरको रूपमा रहेको गो ड्याडीको कमजोरीले यो समस्या आएको भन्दै बैठकमा उठेको चर्को आवाजलाई शान्त पार्न प्रयास गरेका थिए । नयाँ प्रयोग भएकाले बारम्बार इरर देखिनु र हल गर्न समय कम हुनुले समस्या बढी देखिएको हो भन्दै उनीहरूले वेबसाइटमा समस्या नरहेको पनि प्रस्ट पारे । सर्वसाधारण सबैले बुझ्ने भाषामा सरभर इररको खास कारण सार्वजनिक गर्न नसक्दा अनेक आरोप खेपिरहेको एनआरएन अमेरिकाको विश्वसनीयता र साख आम समुदायमा झनै गुम्दै गएको छ ।


४ फाल्गुन २०७५, शनिबार ०३:२३ मा प्रकाशित