एनआरएनए अमेरिकामा सदस्यता लिन चाहनेलाई रोकिनु विडम्बना करिब नौ हजार सदस्य वने, तीनवटा शाखा गुमे, एउटा थपियो

तोया दाहाल     ४ फाल्गुन २०७५, शनिबार २२:०९    

Anil Baral Real Estate

तोया दाहाल-

समाचार टिप्पणी /

फेब्रुअरी १६/

प्राविधिक हिसाबले सात तहको सुरक्षा घेरा, फोन र इमेलबाट दोहोरो भेरिफिकेशन, र हज्जारौले एकै पटक सदस्यता लिँदा पनि कुनै समस्या आउन नसक्ने गरी बनाएको भनी झ्याली पिटेको एनआरएनए अमेरिकाको वेबसाइट र सरभरमा सदस्यता लिने समय ७२ घण्टा वाकी रहँदा देखिएको समस्याले अमेरिकामा बस्ने नेपाली बिचमा तरङ्ग ल्यायो । सदस्यता लिन फर्म भर्नेको सङ्ख्या बढेको वेला समस्या आउँदा आक्रोश मिश्रित बहस हुनु स्वाभाविक पनि हो । यो समस्याबाट पीडित भएकाहरूको आक्रोश सामाजिक सञ्जालमा छताछुल्ल भएको छ।

 

यही समस्याका कारण एनआरएन अमेरिका सदस्यता छानबिन समिति संयोजक रामकुमार सुवेदीले आफ्नी श्रीमतीलाई सदस्य बनाउन सकेनन् । नेपाली जनसम्पर्क समितिका वरिष्ठ उपाध्यक्ष धनन्जयनरसिंह केसी र न्यूयोकका अध्यक्ष रोशन ढुङ्गानाले आफन्त र परिवारका सदस्यलाई एनआरएनको सदस्य बनाउन पाएनन् । एनआरएनए अध्यक्ष डाक्टर केशव पौडेलका साला प्रभात सापकोटाले श्रीमती र आफन्तहरूलाई सदस्यता दिलाउन सकेनन् । सन्नीभेलका विनोद पौडेललाई पनि सदस्यता लिन र आफन्तलाई सदस्य बनाउन उस्तै सकस भयो । यस्तो पिडाको लामो फेहरिस्त तयार गर्न सकिन्छ । समाजको नेतृत्व गर्छु भन्नेहरू नै अन्तिम समय सम्म सदस्यता नलिने र लास्ट आवरमा सदस्यता लिन पाइएन भनेर हल्ला गर्नु आफैमा लाजमर्दो कुरा हो ।

 

सदस्यता लिन नपाएकाहरूले सामाजिक सञ्जालमा राखेका कुराहरूलाई टिपन टापन गर्ने हो भने पनि पछिल्लो ७२ घण्टामा सरभरमा बारम्बार आएको समस्याले करिब २५ सय भन्दा बढिलाई सदस्यताको अवसरबाट विमुख गराएको देखिन्छ । एनआरएन अमेरिकाका लागि यो सर्वाधिक लज्जाको विषय हो । समय बढाउँदा संस्था कब्जा गर्न सदस्यता अवधि बढाएको आरोप खेप्नु भन्दा प्राविधिक कमजोरी र समस्यालाई थाती राखेर सदस्य बन्न चाहने सयौलाई वञ्चित गर्दै शुक्रवार राती १२ बजे एनआरएन अमेरिकाले सदस्यता आवेदन बन्द गर्‍यो । अन्तिम समयमा आकस्मिक बैठक बसेर पनि संस्था भित्र प्रवेश गर्न ढोका ढकढकाइरहेका सदस्यहरूलाई भित्र प्रवेश गर्न दिने पक्षमा एक जना पनि नदेखिनु अर्को विडम्बना हो । अन्तिम समयमा मात्र यस्ता काममा जुट्ने नेपालीहरूको बानीलाई सुधार्न र संस्था कब्जा गर्ने षडयन्त्र भयो भनेर आरोप लगाउनेहरूलाई पनि बोल्ने बाटो नहोस् भनेर समय नथप्ने पक्षमा कार्यसमिति कठोर बनेको उनीहरूको तर्क छ । कमजोरी भेटेपछि खोट लगाउन दाउ हेरेर बस्नेहरू पनि यसमा जिम्मेवार छन् । तर विधानत १५ दिन सदस्यता समय बढाउन सकिने ठाउँ अझै बाकी रहँदा यस्तो हठि निर्णय कुनै पनि हिसाबले संस्थाको दीर्घकालीन हितमा हुन सक्दैन ।

 

एकातिर नक्कली सदस्यता रोक्ने नाममा सदस्यता फर्म भर्ने प्रक्रिया झण्झटिलो बनाइनु, स्टेट र फेडरल आइडी मागिनु, त्यसको जाँच, निगरानी र आइटी गरी तीन तहको समिति बनाइनु अर्को तर्फ यो प्रक्रियाबाट सदस्यता नलिनुस् भनेर प्रोपोगण्डा गर्ने व्यक्ति, समूह र संस्थाहरू सक्रिय हुँदा निर्माण भएको प्रतिकुल परिस्थिति र त्यस माथि सरभरको समस्या थपिदा पनि सदस्य सङ्ख्या नौ हजारको हाराहारीमा देखिनु सामान्य होइन । सदस्यता दिने र लिने प्रक्रिया कडा गर्नु पर्छ भनेर चर्को आवाज उठाउनेहरू नै सदस्यता आवेदनमा कडाइ गर्ना साथ सदस्यता नलिनु भनेर कोलाहल मच्चाउन थाले । १०–१५ प्रतिशतलाई छोड्ने हो भने बाकी सदस्य यस पटक आफैले सदस्यता लिएका छन् । यदि नेतृत्वका लागि सबै भन्दा बढी आकाङ्क्षी देखिएका कार्यसमिति भित्रकालाई आचार संहितामा बाँधेर उम्मेदवारी घोषणा र समूह बनाएर सदस्य बनाउने दौडमा जान नरोकेको भए सदस्य सङ्ख्या २० हजार पुग्ने सहजै अनुमान गर्न सकिन्छ ।

 

एनआरएनको नेतृत्व लिन सबै हर्कत गर्ने , नसक्ने पक्ष अदालत जाने र संस्थालाई बदनाम गर्न सबै शक्ति खर्च गर्नेहरूको लडाइनमा एनआरएनलाई माया गर्ने साधारण सदस्यहरू थिचिएका छन् । गहिरिएर हेर्ने हो भने एनआरएनए अमेरिकामा सदस्यता देखि लिएर हरेक प्रकारका गलत अभ्यास, कर्म र लडाइ हुनुमा केही पात्र प्रमुख जिम्मेवार छन् । पूर्व अध्यक्ष खगेन्द्र जी सी, अध्यक्ष केशव पौडेल, गौरी जोशी, सोनाम लामा, रविना थापा, नगेन्द्र पौडेल लगायतको केही व्यक्तिको लडाइ र गलत हर्कतले एनआरएनएमा सबै जना गोलबद्ध हुन हिचकिचाइरहेका हुन् । नेपाली काँग्रेस निकट जनसम्पर्क समिति, नेपाल कम्युनिस्ट पार्टी निकट प्रवासी मञ्च र राप्रपा निकटका नेता र झुण्डहरुको दाउपेच र खेलकुदले पनि यो संस्थालाई थिलथिलो बनाएको छ । यी सीमित समूह र व्यक्तिका कारण आम सदस्य माथि विभिन्न खालको निगरानी र सदस्यता लिने प्रक्रियालाई भारी बनाइएको हो ।

तीनवटा शाखा गुमे, एउटा थपियो

प्रतिकुल अवस्था हुँदा हुँदै पनि सदस्यता सङ्ख्या नौ हजार पुगेका कारण यस पटक पनि एनआरएनए अमेरिका नै विश्वको सबैभन्दा ठुलो एनसीसी हुने भएको छ । अमेरिका भित्र रहेका २२ वटा शाखा मध्ये १९ वटा शाखाले सदस्यता सङ्ख्या एक सय नघाएर आफ्नो अस्तित्व जोगाएका छन् । शुक्रवार राती १२ बजेसम्म सदस्यता सङ्ख्या एक सय पु¥याउन नसकेर मिचिगन, जोर्जिया र ओहायोले शाखा गुमाएका छन् । नेपालीहरूको पातलो बस्ती रहेको केन्ससले यस पटक सदस्यता सङ्ख्या एक सय नघाएर एनआरएनमा नयाँ शाखाको रूपमा दर्ज हनु लागेको छ ।

 

भेरिफिकेशनवाट सदस्यता नम्बर धेरै तलमाथि भएन भने यस पटक एनआएन अमेरिकामा १९ शाखा हुने छन् । सदस्यता सङ्ख्याको हिसाबले यस पटक न्यूयोर्कले टेक्ससलाई उछिन्दै सबै भन्दा ठुलो शाखा बनेको छ । यस अघिको सबै भन्दा ठुलो शाखा टेक्सस सदस्य सङ्ख्याका हिसाबले यस पटक दोस्रोमा झरेको छ । नेपालीहरूको घना बस्ती रहेको क्यालिफोनियालाई उछिन्दै मेरिल्याण्ड तेस्रो ठुलो शाखा बनेको छ । इलिनोइ, कोलोराडो, कनेक्टिकट, आइओवा, इन्डियाना, म्यासाचुसेट, न्यु ह्यामसायर, न्यु मेक्सिको, ओरेगन, वासिङ्टन, नर्थ क्यारोलेना, भर्जिनिया, केन्टकी, विसकनसिन र केन्सस शाखा भएका छन् ।


४ फाल्गुन २०७५, शनिबार २२:०९ मा प्रकाशित