डिपिएलः प्लेअफमा समिकरण पुरा, घरेलुटिम धनगढी बाहिरियाे, अत्तरियासँगै महेन्द्रनगर अघिल्लो चरणमा

दूरबिन नेपाल     ६ फाल्गुन २०७५, सोमबार १३:३१    

Anil Baral Real Estate

धनगढी । रूस्लान धनगढी प्रिमियर लिग (डीपीएल) क्रिकेटको प्लेअफ समिकरण पुरा भएको छ । सोमवार भएका खेलको नतिजाले प्लेअफमा पुग्ने चार टोलीको टुङ्गो लागेको हो ।

 

हाल सम्म अपराजित काठमाण्डौ ७ अंक सहित शिर्ष स्थानमा रह्यो । सिवाईसी अत्तीया दोस्रो स्थानमा रहेको छ । समान ६ अंक भएपनि रुपन्देही च्यालेन्जर्स रन रेटका आधारमा तेस्रो स्थानमा रहेको छ । महेन्द्रनगर युनाईटे र विराटनगर किंग्सको समान चार अंक भएपनि रनरेटका आधारमा महेन्द्रनगर प्लेअफमा पुगेको छ ।

 

पहिलो स्थानमा रहेको काठमाण्डौ र दोस्रो स्थानमा रहेको सिवाईसी अत्तरिया बीचको खेल हुन बाँकी रहेको छ । त्यसले पहिलो र दोस्रो स्थानमा रहने टीमको टुङगो लाग्नेछ । सोमबारको दोस्रो खेलमा विराटनगर किंग्सलाई १० रनले हराउँदै अत्तरीया प्लेअफको पुगेको हो ।

 

टस जितेर पहिले ब्याटिङ गरेको अत्तरियाले पुरै २० ओभर खेल्दै ३ विकेटको क्षतिमा प्रतियोगिताकै सर्वाधिक ठुलो स्कोर १४८ रन बनायो । अत्तरियाको उच्च स्कोरमा सन्नी पटेल र जय किशन कोल्शावालाले अर्धशतकीय ईनिङस खेले । बिस्फोटक ब्याटिङ गरेका सन्नीले अविजित ६१ रन बनाए । ३१ बलमा ५ चौका र ४ छक्का प्रहार गरेका सन्नीले अन्तिम ओभरमा किशोर महतोको बलमा २ छक्का र ३ चौका प्रहार गरे । सन्नी डीपीएलमा अर्धशतक पुरा गर्ने पाँचौ खेलाडी समेत बने ।


यस्तै कोल्सावाला ५१ रनमा अविजित रहे । डीपीएलमा अर्धशतक बनाउने चौंथो खेलाडी बनेका कोल्सावालाले ५० बलमा ५ चौका र २ छक्का प्रहार गरे । यस्तै जितेन्द्र सिंह ठकुरीले १३ तथा कप्तान दिपेन्द्र सिंह ऐरीले १० रन बनाए । विराटनगरका सुशन भारी र संसद शेखले समान १÷१ विकेट लिए ।

फाप्ला क्रिकेट मैदानमा अत्तरियाले दिएको १४९ रनको लक्ष्य सहित जवाफी ब्याटिङ गरेको विराटनगरले पुरै २० ओभर खेल्दै ८ विकेट गुमाएर १३८ रन मात्र बनाउन सक्यो ।विराटनगरका लागि आसिफ शेखले सर्वाधिक ३९ रन बनाउदा पृथु बास्कोटाले २७ रन जोडे । यस्तै अभिनाश यादवले १४ असद उल्लाह खान पठानले १३ रन बनाए । कप्तान करण केसी १२ रनमा आउट भए । अत्तरियाका भुवन कार्की र दिपेन्द्र रावतले समान ३÷३ विकेट लिए ।

 

धनगढी जित विहिन हुदै बाहिरियाे 

 

दिनको पहिलो खेलमा जित हात पारेर रुपन्देही च्यालेन्जर्स तेस्रो संस्करणको रुस्लान धनगढी प्रिमियर लिग (डीपीएल) क्रिकेटको प्ले अफमा पुगेको छ ।साविकको विजेता धनगढी स्टार्सलाई ३९ रनले पराजित गर्दै रुपन्देही प्ले अफमा पुगेको हो । धनगढी भने जित विहीन भएर तेस्रो संस्करणबाट वाहिरिएको छ ।

बसन्त रेग्मीको कप्तानीमा रहेको रुपन्देहीले फाप्ला क्रिकेट मैदानमा टस जितेर पहिले ब्याटिङ गर्दै १५ ओभरमा ९ विकेट गुमाएर १०६ रन बनायो । हुस्सुको कारण ढिला सुरु हुँदा १५ ओभरमा खटाएर खेलाईएको खेलमा रुपन्देहीका लागि सुमित महर्जनले सर्वाधिक ३३ रन बनाए । यस्तै विनोद भण्डारीले २४ रन बनाए । रुपन्देहीका बाबर हायातले १९ रन जोड्दा विक्रम शोवले ११ रन बनाए । धनगढीका कप्तान सोमपाल कामी, पवन सर्राफ र विपिन खत्रीले समान २÷२ विकेट लिए ।

 

रुपन्देहीले दिएको १०७ रनको लक्ष्य सहित जवाफी ब्याटिङ गरेको धनगढी १४ ओभरमा अलआउट हुँदै ६७ रनमा समेटियो । धनगढीका पवन सर्राफले सर्वाधिक १५ रन बनाए । यस्तै कप्तान सोमपाल कामीले ११ रन जोड्दा सन्दीप रजालीले १० रन बनाए । धनगढीलाई सस्तैमा समेट्न रुपन्देहीका ललित सिंह भण्डारीले ३ तथा विक्रम सोवले २ विकेट लिए । जितसंगै रुपन्देहीले ५ खेलबाट ६ अंक जोडेको छ । रुपन्देही अंक तालिकाकोे दोस्रो स्थानमा उक्लिएको छ । साविकको विजेता धनगढी भने जित विहीन बन्दै घर फर्किएको छ । धनगढीले ५ खेलमा मात्र १ अंक जोड्न सक्यो । अघिल्ला दुई संस्करणको विजेता धनगढी पहिलो पटक प्ले अफ नपुग्दै प्रतियोगिताबाट बाहिरिएको हो ।

लिटल फ्लावर सुपर लिगको प्रथम पुरस्कार र सहप्रायोजक बीच सम्झौता

कैलालीको धनगढीमा हुने विद्यालय स्तरीय मृग गार्मेन्ट उद्योग लिटिल फ्लावर सुपर लिग अन्तर विद्यालय फुटबल प्रतियोगिता २०७५ को प्रथम पुरस्कार र सह प्रायोजकसँग सम्झौता गरिएको छ । आज धनगढीमा पत्रकार सम्मेलन गदै प्रथम पुरस्कार एडुपल नेपाल र सह–प्रायोजक ईमेज बुक्स एण्ड स्टेसनरीले गर्ने सम्झौता गरिएको हो । आयोजक लिटिल फ्लावर हाई स्कुलका प्रिन्सिपल रामचन्द्र शाहीसँग एडुपल नेपालका प्रबन्ध निर्देशक टेकराज पन्त र ईमेज बुक्स एण्ड स्टेसनरीका सञ्चालक दिप रावतसँग सम्झौता गरिएको हो ।

प्रतियोगितामा धनगढी र अत्तरियाका गरी १२ टिमको सहभागिता रहेको प्रतियोगिता फागुन १३ गतेदेखि १८ गतेसम्म धनगढी रंगशालामा हुनेछ । चटकपुरमा रहेको मृग गार्मेन्ट उद्योगले मुख्य प्रायोजन गरेको प्रतियोगिताको विजेताले नगद ३० हजार र उप विजेताले १५ हजार पाउनेछन् ।

तस्वीर : आयाेजक 


६ फाल्गुन २०७५, सोमबार १३:३१ मा प्रकाशित