एनआरएनएमा नेकपा र नेपाली काँग्रेसको छाया निर्वाचन आचार्यको नेतृत्वमा प्रजातन्त्रवादी र पन्तको नेतृत्वमा वामपन्थी समूह

दूरबिन नेपाल     २७ आश्विन २०७६, सोमबार २१:५३    

Anil Baral Real Estate

काठमांडौं ।

यही अक्टोबर १५ देखि १७ सम्म हुने गैरआवासिय नेपाली सङ्घको अधिवेशनका लागि यस पटक एनआरएनएमा वामपन्थी र प्रजातन्त्रबादीहरु समूह बनाएरै मैदानमा उत्रिएका छन् । प्रजातान्त्रिक समूहबाट कुल आचार्यको समूहमा उपाध्यक्षमा डाक्टर केशव पौडेल (अमेरिका) मन केसी (अस्ट्रेलिया) , नरेन्द्र भाट (मध्यपूर्व) र महिला उपाध्यक्षमा रविना थापा रहेका छन् ।

लामो कसरत पछि आचार्यको समूहबाट महासचिवमा जानकी गुरुङको नाम तय भएको छ । महासचिवका दवेदार डाक्टर केशव पौडेललाई उपाध्यक्षमा मनाउन पूर्व अध्यक्ष शेष घले, अध्यक्ष भवन भट्ट, अध्यक्षका दाबेदार कुल आचार्य र नेपाली काँग्रेसका नेताहरूले धेरै मेहनत गर्नु परेको थियो । एनआरएनएमा कब्जा जमाएर बसेका वामपन्थीहरूले अमेरिकालाई कमजोर बनाइराख्न सबै भन्दा बढी दुख दिएका व्यक्ति डाक्टर पौडेल हुन । एनआरएनएमा रसियन ब्लक र वामपन्थी सिन्डिकेट तोड्न आचार्यको नेतृत्वमा बनेको टिममा शक्ति सन्तुलनका लागि सबै अट्नु र मिल्नै पर्ने भएका कारण आफू उपाध्यक्षमा जान बाध्य भएको केशव पौडेलले आफू निकटहरूसँग बताएका छन् ।

एनआरएनए अमेरिकामा डाक्टर केशव पौडेलकै साथ सहयोगमा उपाध्यक्ष निर्वाचित रबिना थापा दोस्रो कार्यकालमा डाक्टर पौडेलसँग अध्यक्षमा प्रतिस्पर्धा गर्दै पराजित भएपछि मुद्धामामला र भौतिक आक्रमणमा समेत उत्रिएकी थिइन । ‘राजनीतिमा स्थायी शत्रु र मित्र कोही हुँदैन’ भन्ने उक्तिसँग सुहाउँदो परिस्थिति निर्माण भएको छ । पौडेल र रबिना थापा सिन्डिकेट तोड्ने मिसनमा एउटै समूहबाट उपाध्यक्ष भएर चुनावी मैदानमा सहकार्य गरिरहेका छन् । धेरैले यो संयोगलाई ‘भाग्यमानी रबिना’ को सज्ञा दिएका छन् । आचार्यको समूहबाट महेश श्रेष्ठको नाम सचिवमा र कोषाध्यक्षमा सोप सापकोटा नाम तय भएको छ । कुल आचार्यले आफूसँग मिलेर अगाडि जान चाहेकाहरूलाई साथमा राखेर आफ्नो घोषणा पत्र समेत सार्वजनिक गरेका छन् ।

वामपन्थी समूहबाट अध्यक्षका उम्मेदवार कुमार पन्तको टिममा बसेर प्रतिस्पर्धा गर्ने अधिकांश उम्मेदवारहरूको छनौट नेपाल कम्यूनिष्ट पार्टीका अध्यक्षद्वय केपी ओली र पुष्पकमल दाहाल, पूर्व प्रधानमन्त्री माधव कुमार नेपाल, महासचिव ईश्वर पोखरेल, नेता भीम रावलले सहमतिमा टुंग्याएका छन् । प्रजातान्त्रिक समूह अनपेक्षित रूपमा बलियोहुँदै गएपछि केही हताश र निराश देखिएको पन्त नेतृत्वको वामपन्थी समूह प्रजातन्त्रवादीहरुको समूहमा नअटाएकाहरूलाई मिलाएर टिम आज सार्वजनिक गर्दै छ । एनआरएनएमा स्थापना काल देखिको आफ्नो एकल वर्चस्वलाई कायम राख्न नेकपाले पन्त समूहलाई जिताउन आफ्नो सम्पूर्ण शक्ति प्रयोग गरेको छ ।

अध्यक्षका प्रतिस्पर्धी कुमार पन्त र कुल आचार्यको समूह निर्माणमा यसरी नेकपा र नेपाली काँग्रेस नै निक्कै गंभिर भएर लागि परेका छन् । यस पटक एनआरएनए निर्वाचन नेपाल कम्यूनिष्ट पार्टी र नेपाली काँग्रेसको छाया निर्वाचनको रूपमा देखापरेको छ । एनआरएनए निर्वाचनमा वामपन्थी र प्रजातन्त्रबादी समूह बाहिरबाट रहर र लहडमा उम्मेदवारी दिनेहरूको सङ्ख्या यस पटक न्यून हुने अनुमान गरिएको छ । साथै समूहमा नपर्नेहरूले यस पटक जित निकाल्न प्राय असम्भव देखिएको छ ।


२७ आश्विन २०७६, सोमबार २१:५३ मा प्रकाशित