डाक्टर बाबुराम भट्टराई विरुद्ध अमेरिकामा मुद्धा हाल्ने तयारी

अमेरिका १९ सेप्टेम्बर/
अमेरिका भ्रमणमा रहेका पूर्व प्रधानमन्त्री डाक्टर बाबुराम भट्टराई विरुद्ध ‘युद्ध अपराध र मानवता विरुद्धको अपराध’मा अमेरिकामा मुद्दा दायर गर्ने तयारी भइरहेको छ । माओवादीले निर्मम ढङ्गले हत्या गरेका २४ परिवारका सदस्यहरू बाबुराम भट्टराई अमेरिका भ्रमणमा रहेको समयमा मुद्दा दायर गर्न आपसी छलफलमा जुटेका छन् । छलफलमा इन्टरनेशनल क्रिमिनल कोर्टमा मुद्दा दायरा गर्न चाहिने आवश्यक प्रमाण र कागजपत्रका विषयमा उनीहरूले कानुन व्यवसायीको परामर्श समेत लिएका छन् ।
माओवादीका कारण बुबा गुमाएका हरि भट्टले दूरबिन नेपालसँग कुरा गर्दै भने “न्यायको ढोका ढकढक्याउन जाने विषयमा छलफल भयो । यस विषयमा वकिलसँग पनि परामर्श गरिरहेका छौँ ।” अन्तर्राष्ट्रिय अदालतमा मुद्दा दायर गर्ने तयारी गरिरहेका २४ परिवार मध्ये ८ परिवार भट्टराईको गृह जिल्ला गोर्खाका रहेका छन् । माओवादीका कारण परिवारका सदस्य गुमाएकाले मुद्दा दायर गर्दा बढी प्रभावकारी हुने र तत्काल दोषीलाई नियन्त्रणमा लिन अदालतले आदेश दिन सक्ने वकिलहरूको भनाइ छ । पत्रकार डेकेन्द्र थापा लगायत माओवादीले हत्या गरेका पीडित परिवारको आवाज दबाउन प्र्चण्ड र बाबुरामले हत्याको जिम्मा लिँदै ‘सक्ने भए थुनेर देखाऊ’ भनेर दिएका अभिव्यक्तिहरू अव अन्तर्राष्ट्रिय अदालतमा पेस हुनेछन् । कुनै पनि युद्धका समयमा निसस्त्र मानिसहरूलाई हत्या गर्नु जघन्य अपराध ठहर गर्दै अन्तर्राष्ट्रिय अदालतले त्यसमा संलग्न वा निर्देशन दिनेलाई कारबाहीको दायरामा ल्याउने गरेको छ ।
यस अघि माओवादी पीडितहरूले भट्टराईलाई विरोध स्वरूप अमेरिकाको टेक्ससमा कालो झन्डा देखाएका थिए । भट्टराईको आगामी भ्रमण सूचिमा रहेका क्यालिफोर्निया लगायतका राज्यमा पनि माओवादी पीडितहरूले कालो झन्डा देखाउने सार्वजनिक अभिव्यक्ति दिइसकेकाछन् ।
तस्बिर:अनलाइन