प्रवासी नेपालीलाई दिइने नागरिकतामा राजनैतिक बाहेकका अधिकारहरू प्रदान गरिन्छ : परराष्ट्र मन्त्री ज्ञवाली

अमेरिका, ३० सेप्टेम्बर/ ह्युस्टनमा आयोजित अन्तरक्रिया कार्यक्रममा नेपाल सरकारका परराष्ट्र मन्त्री प्रदीप ज्ञवालीले नेपालको विकासमा प्रवासी नेपालीलाई सहयोगी र विकास साझेदार हुन सक्ने बताउनु भएको छ। संयुक्त राष्ट्रसंघको महासभामा भाग लिन अमेरिका आउनु भएका मन्त्री ज्ञवाली अमेरिकाको विभिन्न शहरमा रहेका नेपाली समुदायका कार्यक्रममा व्यस्त रहनु भएको छ ।
मन्त्री ज्ञवालीले आफ्नो मन्तव्यको क्रममा भन्नुभयो-” एकले अर्कालाई दोषी देखाएर हामी कहीँ पनि पुगिंदैन, सबै मिलेर देश निर्माणमा लागौँ। सदैव समस्या मात्र खोज्ने काम हैन, समाधान खोज्ने प्रयत्न गरौँ । देश बनाउनको लागि सर्वप्रथम बनाउन सक्छौँ भन्ने आत्मविश्वासको विकाश गर्नु पर्छ । “हामीले बनाएको संविधान जनताले प्राप्त गर्ने अधिकार, समावेशी र सामाजिक न्यायको सिद्धान्तको हिसाबले विश्वमा नै नमुनाको रूपमा रहेको छ । संविधान आवश्यक भएमा संशोधन गर्न समेत सकिन्छ ।” मन्त्री ज्ञवालीले भन्नु भयो।

मन्त्री ज्ञवालीले अगाडि भन्नु भयो,”नेपालमा भूकम्प जाँदा होस् वा बाढी जाँदा प्रवासी नेपालीको मन दुखेको छ, सहयोग भएको छ । तपाईँहरू स्वयं फर्कन नसके पनि आर्जन गरेको जाँगर, सीप तथा साधनलाई नेपाल ट्रान्सफर गरौँ ।
चिन र भारतसँग हामीले कुनै कुरामा प्रतिस्पर्धा गर्न सक्दैनौ तर देशभक्ति र रास्ट्रभक्तिमा नेपालीको भावना अटुट छ। सदैव सकारात्मक सन्देश दिने गरौँ, नकारात्मक मात्र नखोजौं। देश बनाउन सकारात्मक सन्देशले मात्र काम गर्दछ ।”
प्रवासी नेपालीहरुको चासोको रूपमा रहेको गैर आवासीय नेपाली नागरिकताको विषयमा मन्त्री ज्ञवालीले भन्नुभयो,”बन्न लागेको नेपाली नागरिकता सम्बन्धी ऐनमा संविधानसँग बाझिने कुराहरू हटाइने छ । प्रवासी नेपालीहरूलाई लगानीको वातावरण बनाइने छ । प्रवासीलाई प्रदान गरिने नागरिकतामा राजनैतिक अधिकार बाहेक अन्य अधिकारहरू प्रदान गरिने छ । नेपालको विकासका लागि प्रवासी नेपालीहरूले हातेमालो गर्नु पर्छ ।”