बद्रि गौतम, दूरबिन नेपाल, न्युयोर्क, मे ३०
अमेरिकी सिमा सुरक्षा बलले टेक्ससको एल पासो क्षेत्रबाट सयौं आप्रवासीहरुलाई पक्राउ गरेको छ । पक्राउ पर्ने आप्रवासीहरुले गैर कानुनी रुपमा अमेरिकी सिमामा प्रवेश गरिरहेका थिए । पक्राउपर्ने आप्रवासीहरुको संख्या एक हजार ३६ रहेको अमेरिकी कष्टम एण्ड बर्डर प्रोटेक्सन (सीबीपी)का सहायक कमीसनर रोबर्ट ए प्रेजले जनाएका छन । प्रेजका अनुसार एकै पटक यति धेरै अवैध आप्रवासीहरुलाई पक्रेको पहिलो पटक हो । बुधबार विहान चार बजेको समयमा अमेरिकी सिमामा प्रवेश गर्दै गरेको अवस्थामा अवैध आप्रावासीहरुको समुहलाई सिमा सुरक्षामा खटिएका सीबीपीका सुरक्षाकर्मीहरुले नियन्त्रणमा लिएका थिए । पक्राउपर्नेहरु ग्वाटेमाला, होण्डुरस र एल साल्चाडोरका नागरिक भएको सीबीपीले जनाएको छ । पक्राउ पर्नेहरुमा महिला बालबालिकापनि रहेका छन । उनीहरु मानव तस्करहरुको सहायतामा अमेरिका छिर्न खोजेको अनुमान गरिएको छ ।
पक्राउ परेकाहरुको प्रारम्भिक स्वास्थ्य परिक्षणको काम भइरहेको र उनीहरुलाई युएस बर्डर पेट्रोल कष्टडीमै राखिनेछ । यसअघिपनि मेमोरियल डेको दिन सोही स्थानबाट चार सय तीस अवैध आप्रवासीहरु पक्राउ परेका थिए । यो आर्थिक बर्षमा मात्र पाँचलाख ३० हजार अवैध आप्रवासीहरु सोही स्थानबाट पक्राउ परिसकेको सीबीपीले जनाएको छ । अमेरिकी राष्ट्रपति डोनल्ड ट्रम्पले अवैध आप्रवासीहरु रोक्न मेक्सिको क्षेत्रमा कडाइ गरीरहेका छन भने सो क्षेत्रको सिमामा पर्खाल लगाउने कार्यपनि अघि बढिरहेको छ । तर आप्रवासीहरु अवैध रुपमा प्रवेश गर्ने क्रम भने रोकिएको छैन ।
तस्विरः सीबीपी
प्रतिक्रिया लेख्नुहोस्:-