काठमाडौं । बुधबार भएको साफ यू–१५ महिला च्याम्पियनसिपको तेस्रो खेलमा नेपालसँग भुटानले हार ब्यहोरेको छ ।
बंगलादेशको बीएसएसएस मुस्तफा कमल मैदानमा दोस्रो हाफको सुरुमै सब्स्टिच्युड सेनु परियारले गरेको गोल नेपालको जितमा निर्णायक बन्यो । वर्षा ओलीको स्थानमा मैदान छिरेकी उनले ४९औं मिनेटमा गोल गरेकी थिइन् ।
यो जितसँगै नेपालले उपाधिको सम्भावना बलियो बनाएको छ । प्रतियोगितामा नेपालको यो लगातार तेस्रो जित हो । यसअघि भुटानलाई नै ७–० ले हराएको नेपालले घरेलु टोली बंगलादेशमाथि १–० गोलअन्तरको जित रचेको थियो ।
तीन टोली सम्मिलित प्रतियोगिता डवल राउण्ड रोविन प्रणालीमा खेलाइएको छ । भुटानले नेपाल र बंगलादेशसँग दुवै खेलमा पराजित भएपछि नेपाल र बंगलादेशबीच हुने प्रतियोगिताको अन्तिम खेलले उपाधिको छिनोफानो लगाउनेछ ।
प्रतिक्रिया लेख्नुहोस्:-