‘अमेरिकामा नेपाली भाषा  पाठ्यक्रम ढाँचाको तयारी’

मातृभूमी नेपालबाट बिभिन्न कारणले प्रवासमा रहन पुगेका नेपालीहरुलाई नेपालको भौगोलिक,  सांस्कृतिक, ऐतिहाँसिक जानकारीका साथै नेपाली भाषा र कला लगाएका बिषयमा जानकारी गराई नेपाली पहिचानलाई पुस्तान्तरण गराउनु हामीसवैको साझा दायित्व रहन जान्छ । धेरै पहिले देखिनै प्रवासमा रहेका नेपालीहरुको छाता संगठन गैर आवासीय नेपाली संघ,अमेरिकाले यस क्षेत्रमा सक्रियताका साथ काम गर्दै आएता पनि एकिकृत पाठ्यक्रमको ढाचाँ र नेपाली नैतिक ज्ञानदर्शन लगायतका पाठ्य सामग्रीको अभावलाई मध्यनजर गरेर एनआरएनए अमेरीकाले बिशेस कदम चालेको छ । जो  ज्यादै स्वगतयोग्य छ ।

यहाँ जिज्ञासा उठ्न सक्छ, नेपाली भाषा र नैतिक शिक्षाको जानकारी गराउन किन पाठ्यक्रमको ढाँचा नै आवस्यक छ त ? यसको आवस्यकता मात्र हैन हामीलाई सख्त जरुरी रहन गएको अवस्था छ । यसको मुख्य कारण हामीसंग प्रवासमा मुख्यतया तीन किसिमका बालबलिकाहरु छन । पहिलो प्रवास मै जन्मेका, बुवा वा आमा मध्ये एक गैर नेपालीमूलका र जसको घरमा नेपाली भन्दा अंग्रेजी वा अन्य भाषा बोलिन्छ । दोस्रो किसिमका नेपाली मूलका बालबालिकाहरु जो  अमेरीकामा जन्मेका र घरमा नेपाली भाषा बोलिएता पनि वालबालिकासंग नेपाली भन्दा अंग्रेजमा कुरा गर्दा अविभावकहरु गर्व र खुसी हुन्छन र यी बालबालीकाले केही नेपाली शब्दावली उच्चारण गर्न सक्छन । तेस्रो किसिमका बालबालिकाहरु नेपालमा केही कक्षा पढेर अमेरीका अविभावकहरुसंग आएका वा नेपली परिवारमा हुर्की रहेका र परिवारले दैनिक नेपाली भाषा सिकाइ रहेका र घरमा पनि अनिवार्य रुपमा नेपाली भाषा र नेपाली नैतिक दर्शनलाई नियमका रुपमा अभ्यास गरि रहेका छन् ।

यी तीनै किसिमका बालबालिकाहरुलाई उमेर अनुसार कक्षागत शिक्षण गर्दा शिक्षकलाई ज्यादै कठिन हुने र बहुकक्षा शिक्षण गराउँदा ठुलो उमेर पुगेका बालबालिकाहरुले सानो भाईबहिनीसंग सिक्दा मनोबैज्ञानीक असर पर्न जाने हुदा धेरै वालबलिकाहरुले कक्षा छोड्ने र प्रगती गर्न नसक्ने देखिन्छ । यसबाट अविभावकहरुले पनि बच्चले यतिका बर्ष सम्म नेपाली भाषा पाठशालामा पढाउदा पनि प्रगती गरेन भन्ने गुनासाहरु गर्ने गरेको देखिन्छन । यसैले कम्तिमा पनि यी तीनै किसिमका सिकाइ भएका बालबालिकाहरुलाई आधार बनाएर पाठ्यक्रम बनाउन सक्यौं र त्यसैबाट निर्देशित पुस्तक तथा पाठशाला संचालन निर्देशिका तयारी, सहजकर्ता शिक्षकएवम् स्वयमसेवकलाई अनलाइन वा फेसटु फेसतालिम दिई परिचालन गर्नसकेको खण्डमा अमेरीका भरी नै नेपाली पाठशाला संचालनमा एकरुपता र गुणस्तर विकासमा टेवा पुग्ने देखिन्छ ।

हालको कोभिड-१९ को यस बिषम परिस्थितीमा त झनै पूर्बिय दर्शनको महत्व बढेको परिपेक्षमा अनलाईन र फेस टु फेस मोडबाट कसरी गुणात्मकम कक्षा संचालन गर्न सकिन्छ भन्ने सम्बन्धमा नेपाली भाषा र नैतिक शिक्षाको पाठ्यक्रम ढाँचा र पाठशाला संचालनको निर्देशिकाको तयारी जस्ता कामले महत्व बोकेको छ । यसको कार्य ढिलै भए पनि एनआरएनए, अमेरीकाको नेपाली पाठशाला टास्कफोर्स कमिटीले आफ्नो कार्यलाई द्रुत गतिमा अगाडि बढाउने लक्ष्य सहित कार्यको  थालनी गरेको छ । जसकालागि एनआरएनए अमेरीकाका अध्यक्ष सुनिल शाह, बरिष्ठ उपाध्यक्ष डा. अर्जुन बन्जाडे, महासचिव पशुपति पाण्डे, कोषाध्यक्ष नेत्र बन्धु पोखरेल लगाएतका पदाधिकारीहरुले टास्कफोर्स कमिटीका हरेक कामलाई प्राथमिकताका सहयोग गर्ने बचनबध्दता देखाएका छन ।

कोभिड-१९ को यस विषम परिस्थितिमा अमेरीका भरीका ५० ओटै राज्य र बिश्वका अन्य देशमा बस्ने नेपालीहरुलाई समेत सहयोग पुग्ने गरि भर्खरै पाठशाला टास्कफोर्स कमिटीका को-चियर भोज बलायरबाट लिखित तथा एनआरएनए, टेक्सास च्याप्टरबाट प्रकाशित आधारभुत तहको नैतिक ज्ञानदर्शन र नेपाली अक्षरमाला कितावले केही हदसम्म यस अभियानलाई सहयोग पुगाएको देखिएको छ । जो बिशुध्द सामाजिक सेवाको भावबाट गरिएको काम हो । सिमित संख्यामा प्रकाशित गरिएका स-साना आकारकायी पुस्तकलाई  प्रकाशन गर्ने एनआरएनए, टेक्सास च्याप्टरले पाठशाला संचालनका लागि केही प्रति निशुल्क रुपमा उपलब्ध गराउदै आएकोले यसका लागि टेक्सास च्याप्टरका अध्यक्ष राजेश अर्यालसँग सम्पर्क गर्न अनुरोधका साथै  छिट्टै एनआरएनएको वेवसाईटबाट समेत प्रकाशित गरिने छ ।एनआरएनए, अमेरीका र टेक्सास च्याप्टरले सुआत गरेको यो प्रशंसनिय कामले आगामि दिनमा थप सामग्रीहरुको तयारीलाई तदारुपकताका साथ अगाडि बढाउन झकझकाउने बिश्वस लिईएको छ ।