अमेरिका, जुन ७/ अमेरिकी राष्ट्रपति डोनल्ड ट्रम्पले भर्खरै ट्विटर सन्देश मार्फत अमेरिका र मेक्सिकोबीच एक सहमतिपत्रमा हस्ताक्षर भएको जानकारी गराएका छन्। सहमति अनुरूप अमेरिकाले मेक्सिकोबाट आयात हुने सबै सामानमा लगाउने तयारी गरेको कर हाललाई अनिश्चित समयका लागि स्थगित गरिएको राष्ट्रपतिले ट्वीटमा लेखेका छन्।
मेक्सिकोको सीमा क्षेत्रबाट गैरकानूनी आप्रवासीहरुको प्रवेश रोक्न मेक्सिकोले पहल नगरेको भन्दै गत मे ३० मा मात्र राष्ट्रपति ट्रम्पले एक आकस्मिक घोषणा मार्फत मेक्सिकोबाट आयात हुने सबै सामानहरुमा यही १०, २०१९ बाट लागु हुने गरी ५ प्रतिशत र त्यसपछि क्रमश बढाएर अक्टुवर १ बाट २५% कर लगाउने निर्णय गरेका थिए। इन्टरनेशनल इमर्जेन्सी इकोनमिक पावर एक्ट’ले राष्ट्रपतिलाई दिएको अधिकार प्रयोग गर्दै राष्ट्रपति ट्रम्पले उक्त आकस्मिक घोषणा गरेका थिए।
मेक्सिको माथि दबाव बढाएर मेक्सिको हुँदै अमेरिका प्रवेश गर्न खोज्ने गैरकानूनी आप्रवासीलाई रोक्ने नीति अन्तर्गत नै राष्ट्रपति ट्रम्पले उक्त घोषणा गरेको विश्लेषकहरुले पहिल्यै अनुमान गरेका थिए। मेक्सिकोसंगको सम्झौताको बिस्तृत बिवरण केही बेरमा डिपार्टमेण्ट अफ स्टेटले जानकारी गराउने समेत राष्ट्रपतिले अर्कों ट्वीटमा लेखेका छन्। अब मेक्सिको हुँदै अमेरिका प्रवेश गर्न खोज्ने गैरकानूनी आप्रवासीहरुलाई अमेरिका आउन सहज नहुने अनुमान गरिएको छ।
स्रोत: अमेरिकी राष्ट्रपतिको ट्वीटर सन्देश
प्रतिक्रिया लेख्नुहोस्:-