फिफा विश्वकप २०१८ अन्तर्गत आज भएको राउण्ड-अफ-१६ को खेलमा ईंगल्याण्डले कोलम्बियालाई पेनाल्टी-सिट-आउटमा ४-३ गोलले पराजित गरेको छ। निर्धारित ९० मिनेटको खेल १-१ को बराबरीमा सकिएपछि खेल एक्स्ट्रा टाइममा गएको थियो। थप ३० मिनेटमा पनि कुनै गोल हुन नसकेपछि पेनाल्टी सुटआउट मार्फत खेलको निर्णय भएको हो। स्टपेज टाइमको तेश्रो मिनेट अर्थात ९०+३ मिनेटमा कोलम्बियाले पाएको कर्नर किकलाई हेडर मार्फत गोल गर्दै कोलम्बियन खेलाडी वाई मिनाले अन्तिम अवस्थामा खेल बराबरीमा ल्याए। नियमित खेल समय मै जीतको अन्तिम मिनेटमा पुगिसकेको बेलायतलाई थप ३० मिनेट र जीत हारको अनिश्चतता भएको पेनाल्टी-सुट-आउटको समेत सामाना गर्नु पय्रो कोलम्बियालाई पाखा लगाउन।
पहिलो हाफ गोल रहित बराबरी खेलेका दुबै टोलीको गोल गर्ने प्रयास सफल भएको थिएन। दोश्रो हाफमा कोलम्बियन खेलाडी कार्लोस सान्चेजले बेलायती खेलाडीलाई डि-बक्समा लडाएपछि दिइएको पेनाल्टी बेलायती क्याप्टेन ह्यारी केनले गोलमा बदलिदिए र बेलायतलाई खेलमा अग्रता दिलाए। सो पेनाल्टी निर्णय देखि नै असंयमित भएका कोलम्बियन खेलाडीहरुले त्यसपछि लगातार फाउल खेल्ने र रेफ्रीसंग बिवाद गर्न थालेको देखिन्थ्यो। तनावपूर्ण दोश्रो हाफको अन्त्यतिर स्टपेज टाइममा गोल गरेर कोलम्बियाले खेललाई लम्ब्याउन सक्यो र खेलको निर्णय पेनाल्टी-सुट-आउटबाट हुने अबस्थमा पुय्रायो।
कोलम्बियन १५ नं जर्सीका खेलाडी एम उर्बीको पेनाल्टी क्रसबारमा लागेर फर्कियो भने अर्का खेलाडी बाक्काको पेनाल्टी प्रहार बेलायती गोलकिपरले रोकिदिए। बेलायतका ८ नं जर्सीका खेलाडी हेन्डर्सनको पेनाल्टी पनि कोलम्बियन किपरले रोकेका थिए।
आजको म्याचका रियल हिरो बेलायती गोलकिपर भए र बेलायतले विश्वकप इतिहासमा पहिलो पटक पेनाल्टी-सुट-आउटमा जित्दै क्वार्टर फाइनल पुग्न सक्यो। नक-आउट चरणको अन्तिम खेलमा बिजयी हुँदै क्वार्टर फाइनल प्रवेश गर्ने अन्तिम टोली भएको छ बेलायत। अब अर्को यूरोपियन देश स्विडेनसंग क्वार्टर फाइनल खेल्ने बेलायतले सो क्वार्टर फाइनल जितेमा १९९० पछि उसको विश्वकपमा सबभन्दा ठूलो सफलता हुनेछ।
विश्वकपमा हालसम्म १४ पटक सहभागि भएको ईंगल्याण्डले १९६६ मा बेलायत मै आयोजना भएको विश्वकप जिते पश्चात १९९० मा चौथो स्थान जितेको थियो। त्यस यता २००२ र २००६ मा क्वार्टर फाइनलसम्म पुगेको बेलायत गत २०१४ मा ब्राजिलमा आयोजित विश्वकपमा भने समूह चरणबाटै बाहिरिएको थियो। आज पेनाल्टी मार्फत गरेको एक गोल समेत जारी विश्वकपमा ६ गोल गरिसकेका क्याप्टेन ह्यारी केनको नेतृत्वमा रहेको बेलायती टोलीलाई यो पटक विश्वकपको सम्भावित दावेदारका रुपमा समेत हेरिएको छ। केन यो पटकको गोल्डेन-बुट प्रतिस्पर्धामा सबभन्दा अघि रहेका छन्।
गत विश्वकपमा सबैभन्दा धेरै गोल (६) गरेर गोल्डेन बुट जितेका जेम्स रोड्रिगेजको देश कोलम्बियाको यो पटक समेत गरेर पाँचौं विश्वकप यात्रा हो। गत विश्वकपमा क्वार्टर फाइनलसम्म पुग्नु बाहेक कोलम्बियाले विश्वकपमा कुनै महत्वपूर्ण उपलब्धी हाँसिल गरेको छैन। कोलम्बियन स्टार खेलाडी रोड्र्गेजले चोटका कारण आजको खेल गुमाएका थिए भने उनको देशले भने विश्वकप यात्राबाटै बाहिरिनु परेको छ।
तस्वीर: फिफा
प्रतिक्रिया लेख्नुहोस्:-