अमेरिकाको सुन्दर सहर सानफ्रानसिस्कोमा नेपाली साँझ

सानफ्रानसिस्को, ३ नोभेम्बर /
अमेरिकामा बसोबास गर्दै आएका नेपालीहरूको पुरानो साथै सक्रिय संस्था मध्येको एक नर्दन क्यालिफोर्निया नेपाली समाज न्यान्सले यस बर्ष पनि नेपाल साँझ कार्यक्रमको आयोजना गर्ने भएको छ ।
अमेरिकाको सुन्दर सहर सानफ्रानसिस्कोमा नोभेम्बर ४ तारिख आइतबार आयोजना गर्न लागिएको नेपाल साँझ २०१८ कार्यक्रमको तयारी लगभग पुरा भएको संयोजक सागर श्रेष्ठले बताए । कार्यक्रमलाई तीन खण्डमा विभाजन गरिएको छ । शुभकामना आदान प्रदान, ठुला दाताहरूलाई सम्मान र त्यसपछि सांस्कृतिक कार्यक्रम शुरु हुने छ ।

न्यान्सका अध्यक्ष रविन्द्र राईले दूरबिन नेपालसँग कुरा गर्दै भने “वरिष्ठ सङ्गीतकार मदन दिब्विमको प्रमुख आतिथ्यतामा नेपाल साँझ २०१८ कार्यक्रम गर्दै छौ । गत धार्मिक महोत्सवमा सबै भन्दा बढी दान गर्ने नेपाली जनसम्पर्क समिति क्यालिफोर्नियाका अध्यक्ष पूर्ण शेर्पा र बे एरियाका व्यवसायी तथा समाजसेवी यज्ञलाल श्रेष्ठ विशेष अतिथि हुनुहुनेछ ।”

सांस्कृतिक कार्यक्रममा नृत्य संयोजन एनआरएन अमेरिकाकी केन्द्रीय सदस्य विन्दु सापकोटाले गर्ने छन् । सफलता दुलाल, प्रार्थना कार्की, प्रतीक रावत, आर्यमान दाहाल, प्रियांका खड्का, एलेक्सा लगायतका स्थानीय कलाकारहरूले नृत्य प्रस्तुत गर्ने छन् । मौलिक नेपाली गीत सङ्गीतमा उनीहरूको नृत्य रहने बिन्दु सापकोटाले बताइन् । कार्यक्रम संयोजक सागर श्रेष्ठका अनुसार लक्ष्मी खरेल थापा, तालमान मगर, निता थुलुङको गायन कार्यक्रमको अर्को आकर्षण हो । कार्यक्रममा निःशुल्क प्रवेशको व्यवस्था मिलाइएको छ । सहभागीहरूले स्वइच्छाले सहयोग गर्न भने पाउने छन् ।

सन् १९९५ देखि न्यान्सले नेपाल साँझ कार्यक्रम गर्दै आएको छ । नेपाल साँझ पहिला दशै अगाडि हुने गर्दथ्यो । अहिले दशै र तिहारको बिचमा गर्न लागिएको छ । न्यान्सका पूर्व अध्यक्ष उत्तम कार्कीले दूरबिन नेपालसँग भने “सन् २००० सम्म नेपाल साँझ सानफ्रानसिस्को बे एरियाको मात्र होइन अमेरिकामा आयोजना गरिने नेपाली कार्यक्रममा सर्वाधिक चासो र चर्चाको शिखरमा थियो ।” हुन त त्यस समयमा न्यान्ससँग अरू धेरै कार्यक्रम नभएर पनि नेपाल साँझले विशेष महत्त्व पाएको हो । अहिले न्यान्ससँग धेरै कार्यक्रम छन् । जसले गर्दा नेपाल साँझ नाम र निरन्तरताका लागि मात्र जस्तो भएको छ । पत्रकार रवि लामिछानेको सहयोगमा सन् २०१३ मा मदन कृष्ण र हरिवंशलाई नै उपस्थित गराएर न्यान्सले आफ्नो इतिहासमा सबै भन्दा भव्य नेपाल साँझ कार्यक्रम गरेको थियो ।
नेपाली कलाकार नेपालबाट झिकाउँदा संस्था विवादमा तानिने र बदनाम हुने सम्भावना बढे पछि स्थानीय नेपाली कलाकारहरूबाटै नेपाल साँझ कार्यक्रमलाई निरन्तरता दिइएको छ । नेपाली चाड पर्व गीत, सङ्गीत, कला,संस्कार संस्कृतिसँग नेपालीलाई जोडी राख्न न्यान्सले नेपाल साँझलाई दिइरहेको निरन्तरतालाई धेरैले प्रशंसा गरेका छन् ।