फिल्म चल्नु पूर्व नै चि मुशी चिलले अमेरिकामा २८ लाख रुपैयाँ उठायो

सानफ्रानसिस्को ११ डिसेम्बर /
कुनै पनि फिल्म हलमा चलेपछि मात्र त्यसले के कति व्यापार गर्छ भन्ने थाहा हुन्छ । तर नेपाली चलचित्र चि मुशी चिले हल नछिर्दै अमेरिकाको एउटा सहरबाट करिब २८ लाख रुपैयाँ सङ्कलन गरिसकेको छ । सानफ्रानसिस्को बे एरियामा मङ्गलवार साँझ प्रदर्शन हुन लागेको चि मुशी चिले एक दिन अगाडि अर्थात् सोमवार साँझसम्ममा २५ हजार डलर अर्थात् २८ लाख रुपैयाँ सङ्कलन गर्न सफल भएको छ ।
चि मुशी चिको प्रारम्भिक सोका लागिसानफ्रानसिस्को बे एरियाका ७० जना स्थानीयबाट मात्र २५ हजार डलर सङ्कलन भएको फिल्म निर्माता मध्येका अनिल पाण्डे र प्रिन्स युवराज कार्कीले दूरबिन नेपाललाई बताए ।” फिल्म चल्नु पहिला नै अमेरिकामा रहेका नेपालीहरूबाट फिल्मलाई यति ठुलो हौसला र आर्थिक सहयोग प्राप्त भएको यो पहिलो पटक हो” पाण्डेले भने “प्रदेशमा रहेका नेपालीहरू नेपाली कलाकार र फिल्मलाई माया गर्छन् भन्ने यसबाट देखियो ।”

नेपालीहरूको घना बस्ती रहेका अमेरिकाका सहर मध्येको एक सानफ्रानसिस्कोमा हरेक वर्ष थुप्रै नेपाली फिल्म देखाइन्छ । तर कुनै पनि फिल्मका लागि यसरी आर्थिक सहयोग जुटेको थिएन । चि मुशी चि फिल्म निर्माणमा अमेरिकाबाट सहयोग गरेका पाण्डे र कार्कीको पहलमा यो सम्भव भएको हो । कार्कीले भने “अनिल दाइले केहीलाई सहयोग गर भन्नु भयो मैले पनि चिने जानेका दुईचार जनालाई सहयोग गर भने । तर ६० प्रतिशत भन्दा बढिले स्वतःस्फूर्त रूपमा सहयोग गर्नु भयो ।”
दिनेश श्रेष्ठले निर्देशन गरेको चि मुसी चिको पहिलो सो यही डिसेम्बर ११ मंगलवार अल्बानीको ल्यान्डमार्क थेटर (1115 Solano Ave, Albany) बाट सुरु हुने भएको छ। यस फिल्म लाई अरुण कुमार गुरुङ, महेश्वर खत्री, सुवास भुर्तेल, डब बहादुर गुरुङ निर्माता रहेको यस फिल्मको कार्यकारी निर्मातामा शिवराज कार्की छन् भने अनिल पाण्डे र प्रिन्स युवराज कार्की प्रस्तुतकर्ता हुन्। यो फिल्मबाट नै नायक सुनिल क्षेत्री र नायिका अलिशा शर्माले डेब्यु गरेका हुन् । सुनिल क्षेत्री, सुशान्त कार्की, अलिशा शर्मा, शिवराज कार्की, शेखर अधिकारी, कमली वाइबालगायतका कलाकारहरूको अभिनय रहेको फिल्ममा सुनिल क्षेत्री र विक्रम स्वाँरको कोरियोग्राफी छ । बासु न्यौपानेले खिचेको फिल्मको सम्पादन भूपेन्द्र अधिकारीले गरेका छन् ।