काठमाडौँ । नेपाल कम्युनिष्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले अमेरिकालगायत अन्तर्राष्ट्रिय समुदायलाई भेनेजुयलाका सम्बन्धमा अहस्तक्षेप, राष्ट्रिय सार्वभौमसता र शान्तिपूर्ण सहअस्तित्वका सिद्धान्तलाई सम्मान गर्न आग्रह गरेका छन् ।
नेकपाका एक अध्यक्ष तथा प्रधानमन्त्री केपी शर्मा ओली डावोस सम्मेलनमा सहभागी भइरहेका बेला दक्षिण अमेरिकी राष्ट्र भेनेजुयलाको पछिल्लो राजनीतिक अवस्थाका बारेमा पार्टीका तर्फबाट शुक्रवार प्रचण्डले विज्ञप्ति प्रकाशित गर्दै उनले सो मुलुकको सार्वभौमसत्ता, अखण्डता र शान्तिको पक्षमा उभिन अन्तर्राष्ट्रिय समुदायलाई आग्रह गरे।
प्रजातान्त्रिक निर्वाचन प्रक्रियामार्फत चुनिएका वैधानिक राष्ट्रपति निकोलस माडुरोलाई मान्यता नदिई आफूलाई राष्ट्रपति घोषणा गरेका हुवान गुवाइदोलाई अन्तर्राष्ट्रिय रुपमा वैधानिकता दिएको भन्दै उनले आश्चर्य व्यक्त गरे ।
“भेनेजुयलाका जनतालाई विभाजित गरी प्रजातन्त्र, सार्वभौमसत्ता र शान्तिलाई चुनौती दिई हिंसा बढाउने मनसायसहित भेनेजुयलाको आन्तरिक मामिलामा अमेरिका र उसका गठबन्धन राष्ट्रले गरेको हस्तक्षेपको नेकपा भत्सर्ना गर्दछ”, अध्यक्ष दाहालको विज्ञप्तिमा भनिएको छ । अध्यक्ष दाहालले भेनेजुयलामाथिको पछिल्लो व्यवहार संयुक्त राष्ट्र सङ्घको बडापत्र र शान्तिपूर्ण सहअस्तित्वमाथि गम्भीर चुनौती भएको स्पष्ट पारेका छन् ।
याे घटनाका सम्वन्धमा प्रधानमन्त्रीकाे धारणा सार्वजनीक भएकाे छैन ।
प्रतिक्रिया लेख्नुहोस्:-