बद्री गाैतम \ दूरवीन नेपाल
न्युयाेर्क । कैयनको लागि सपनाको मुलुक अमेरिका, संसार भरीका मानिसहरुको बसोबास रहेको अमेरिकामा कहिलेकाहीं यस्ता काण्डहरु हुने गर्दछन, जसले संसारलाई चकित बनाउने गर्दछ । अमेरीकी राष्ट्रपति देखि अभिनेतामात्र होइन, साधारण मानिसहरुका सेक्स स्क्याण्डलले बेला बेलामा अमेरिकालाई चर्चित बनाउने गर्दछ ।
अमेरिका खुला समाजको प्रतिबिम्ब हो । खुल्ला समाजको उदाहरण दिनुपर्दा संसार भरिमा सबैभन्दा पहिले आउने नाम हो अमेरिका । तर जति नै खुल्ला समाज भनिएपनि यहाँको कानुनले सबैलाई अनुशासनमा बाँध्ने प्रयास गरेको छ । आफु बाँच तर आफु बाँच्दा अरुलाई असर पुर्याउन पाईदैन भन्ने अमेरिकाको मुल कानुनको उल्लंघन यदि कसैले गर्छ भने त्यो कानुनको कठघरामा उभिनै पर्छ । चाहे त्यो व्यक्ति अमेरिकी राष्ट्रपति नै किन नहोस ।
अमेरिकी इतिहासमा सबैभन्दा चर्चित यौन काण्ड हो विल क्लिन्टन र मोनिका लिवेन्स्कीको । क्लिन्टन राष्ट्रपति भएको बेला सार्वजनिक भएको सो काण्डले संसारभरि चर्चा पायाे । सोही काण्डका कारण उनको राष्ट्रपति पद नै धरापबाट मुश्किलले जाेगियाे । पछि क्लिन्टनले सो काण्डमा आफ्नो संलग्नता भएको स्वीकार्दै अमेरिकी जनता र आफ्नो परिवारसंग क्षमा मागेका थिए ।
यो लेखमा हामीले पछिल्लो बर्ष अमेरिकामा भएका चर्चित यौन काण्ड अर्थात स्क्याण्डलहरुका बारेमा चर्चा गर्ने प्रयास गरेका छौं । राष्ट्रपति डोनल्ड ट्रम्प र स्ट्रोमी ड्यानियल बारे सन् २०१८ को पहिलो महिनाको दोस्रो हप्तामै द वाल स्ट्रीट जर्नलले एउटा रिपोर्ट प्रकाशित गर्यो । जुन रिपोर्टले अमेरिकामा सनसनी त मच्चायो नै, सारा संसारको ध्यान आक्रिष्ट गर्यो ।
रिपोर्टमा अमेरिकी राष्ट्रपति डोनल्ड ट्रम्प र एडल्ट चलचित्रकी अभिनेत्री स्ट्रोमी ड्यानियलका विचको सम्बन्धलाई उजागर मात्र गरेको थिएन । राष्ट्रपतीय निर्वाचनको अभियान चलिरहेका बेला ट्रम्पका वकिल माइकल कोहेनले अभिनेत्री ड्यायिललाई एक लाख ३० हजार डलर बुझाएका थिए । सो रकम राष्ट्रपतिका उमेदवार ट्रम्प र ड्यानियलका विच भएको भनिएको सम्बन्धलाई गोप्य राख्नका लागि थियाे । त्यसकाे पुष्टी स्वयं ड्यानियलले दावी गरेकी थिइन ।
त्यसो त ट्रम्प र ड्यानियलका विचको सम्बन्ध सन् २००६ देखि रहेको कुरा सन् २०११ मा एक ब्लगमार्फत सार्वजनिक भएको थियो । शुरुमा ट्रम्पका वकिल कोहेनले सो आरोपको कडा खण्डनमात्र गरेनन् ट्रम्प र डेयानियलका विच त्यस्तो कुनै सम्बन्ध कहिल्यैपनि नरहेको दावी गरे । तर ड्यानियलले एक अन्तर्वातामा वकिल कोहेनले आफना नाबालिका छोरीकै अगाढि सम्बन्ध सार्वजनिक गरे जेपनि हुन सक्ने भन्दै धम्की दिएको र सोही कारण ट्रम्पसंगको सम्बन्ध गोप्य राख्न आफुले हस्ताक्षर गरेको बताएकी थिइन ।
यो विषय सार्वजनिक भइसकेपछि विभिन्न सरोकारवाला समुहले ट्रम्प र डेयानियलको सम्बन्ध व्यक्तिगत भएपनि उनलाई बुझाइएको भनिएको रकमको श्रोत सार्वजनिक हुनुपर्ने भन्दै कानुनी रुपमै छानविन हुनेपर्ने माग गरे । तर घटनाले एकाकएक यु टर्न त्यसबेला लियो, जब ट्रम्पका वकिल माइकल कोहेनले ड्यानियललाइ रकम बुझाएको स्वीकारे । उनले सो रकम आफ्नो गोजीबाट दिएको न्युयोर्क टाइम्ससंगको अतरर्वाताका बेला बताएका थिए ।
झण्डै दुई बर्षको कानुनी लडाई ट्रम्पकै पक्षमा गएपनि उनका पूर्व वकिल कोहेनलाई झुठो बोलेको भन्दै तीन बर्षको जेल सजाय अदालतले सुनायो । त्यस्तै झुठो आरोप लगाएको तथा नियतवस नै अनावश्यक कानुनी झमेला झिकेको भन्दै स्ट्रोमि ड्यानियलले झण्डै तीनलाख डलर जरिवाना ट्रम्प पक्षलाई तिर्नुपर्ने आदेश दियो । सो जरिवाना रकम कानुनी प्रक्रियामा भएको खर्च भन्दै तिर्न लगाइएको थियो । यो घटनामा राष्ट्रपति ट्रम्पको प्रत्यक्ष संलग्नता नदेखिएकोले खासै फरक परेन । कानुनी रुपमा ट्रम्प र ड्यानियलको स्क्याण्डल एक किसिमले किनारा लगिसकेको छ, तथापी यो स्क्याण्डल अझै सेलाएको भने छैन ।
राष्ट्रपति ट्रम्प र मोडल करेन म्याक डोगल डोनल्ड ट्रम्प राष्टपतिमा चुनिनु भन्दा अघि अर्थात राष्ट्रपतीय चुनावी अभियानको बेला डोनाल्ड ट्रम्पसंग सम्बन्ध रहेको भन्दै अर्की एक अभिनेतृलाई उद्धृत गर्दै समाचारहरु बाहिर आउन थाले । अभिनेतृ हुन अमेरिकी मोडल करेन म्याक डोगल । द वाल स्ट्रीट जर्नलका अनुसार म्याक डोगलले सन २००६ र ००७ को विचमा झण्डै एक बर्ष ट्रम्पसंग सँम्बन्ध रहेको बताएकी थिइन । अभिनेतृ तथा मोडललाई एक लाख ५० हजार डलर दिएर उनको सो एक्सक्लुसिभ स्टोरीको प्रतिलिपी अधिकार अमेरिकन मिडिया इन्टीच्युट अर्थात एएमआइले खरिद गरेको बताइएको थियो ।
एएमआइ त्यो कम्पनी हो जसको स्वामित्व नेशनल एन्क्वाएरर संग छ । यहा बुझ्न पर्ने कुरो यो छ की नेशनल एन्क्वाएररका मालिक डेभिड पेकर ट्रम्पका निकै नजिकका व्यक्ति हुन जो निर्वाचनका बेला ट्रम्पका पक्षमा निकै खटिएका थिए अझैपनि पेकर खुलेर ट्रम्पको वकालत गर्ने गर्दछन । पछि २०१८ को मार्चमा आफ्नाे आत्मकथाको प्रतिलिपी अधिकार खरिद गरेरपनि प्रकाशित नगरेको भन्दै डोगलले एएमआई विरुद्ध मुद्वा हालेकी थिइन ।
उता एएमआइले डोगलको ट्रम्पसंगको सम्बन्धको कथामा विस्वसनीयता नभएकोले प्रकाशित गर्न नसकिएको बताएको थियो । त्यस्तै ह्वाइट हाउसका प्रवक्ताले डोगलको दावी गलत र निराधार भएको प्रतिक्रिया दिएका थिए । निर्वाचनलाई प्रभावित पार्न हो वा सय तथ्य नै हो । जे भएपछि ट्रम्पसंग जोडिएका यी दुई स्क्याण्डलले संसारको ध्यान आकृष्ट गरेको थियो । तर यी दुवै आरोपमा राष्ट्रपति ट्रम्पको संलग्नता पुष्टि हुन भने सकेको छैन ।
सिनेटर अल फ्रान्केन
मिनेसोटाका सिनेटर अल फ्रान्केनले पाँच महिलाले दुर्व्यहारकाे आरोप लगाएपछि राजिनामा दिए नोभेम्बर २०१७ मा । सञ्चारकर्मी लियान टवीडेनले आफ्नो ब्लगमा लेखिन युनाइटेड सर्भिस अर्गनाइजेशनको भ्रमणका बेला सन २००६ मा सिनेटर फ्रान्केनले आफुमाथी यौन दुर्व्यहार गरेका थिए । सिनेटर फ्रान्केनले युएसओ भ्रमणको रिहर्शलको बेला जबरजस्ती चुम्बन गरेको जसका कारण आफुलाई घिनलागेको र पीडित महशुष गरेकोे लेखेकी थिइन ।
सोही भ्रमणका बेला फ्रान्केनले जहाजमा सुतीरहेकी लियानको बक्षस्थलमा हात लगेको फोटोपनि सार्वजनिक भएको थियो । तर सो आरोपका बारे सिनेटर फ्रान्केनले आफुलाई केहि सम्झना नभएको प्रतिक्रिया दिएका थिए । सिनेटरमाथी लागेको यो आरोपका बारे छानविन चलिरहेका बेला फेरी अर्की महिला लिण्ड्से मेन्जलेपनि उनीमाथी यौन दुव्र्यवहार गरेको आरोप लगाइन । फ्रान्केनले मिनेसोटा स्टेट फेअर २०१० का बेला सो दुर्व्यहार गरेको र उनले आफ्नो संवेदनशील अंगमा हात लगेको आरोप लगाइन ।
सो आरोपका बारे सिनेटर फ्रान्केनले, स्टेट फेअरका बेला आफुले हजारौं फोटोहरु खिच्ने र सयौं मानिसहरुले घेरिने हुंदा त्यस्ता घटना याद नहुने बताएका थिए । सिनेटर फ्रान्केनमाथी थप तीन महिलाले यस्तै प्रकृतिका आरोप लगाएका थिए । पछि सन २०१८को जनवरीमा उनले अफ्नो पदबाट राजिनामा दिए ।
जो बर्टन
जो बर्टन जसले अश्लिल भिडियो सार्वजनिक भएपछि अमेरिकी कंग्रेसबाट सन्यास लिए । उनी टेक्ससको छैठौं जिल्लाबाट अमेरिकाको प्रतिनिधि सभामा सन् १९८५ देखि प्रतिनिधित्व गर्दै आएका थिए । रिपब्लिकन राजनीतिज्ञ जो बर्टनको अश्लिल भिडियोको चर्चाले पनि अमेरिकी राजनीति तरंगित बन्यो । बार्टनले हस्तमैथुन गरिरहेको भिडियो धेरै महिलालाई पठाएको आरोप लागेपछि त्यसमाथी उनले माफी मागे र अबको निर्वाचन नलड्ने घोषणा गरे । बर्टनमाथी अर्की महिलाले पनि अश्लिल कुरा गरेको आरोप लगाइन ।
जोन कोनयर्स
मिचिगन राज्यबाट ५० बर्ष देखि अमेरिकी प्रतिनिधिसभामा प्रतिनिधित्व गर्दै आएका डेमोक्रयाट जोन कोनयर्स आफ्नै स्टाफमाथी दुर्व्यहार गरेको आरोप लागेपछि राजिनामा दिए । जोन कोनयर्सलाई पूर्व कर्मचारी माथी यौन दुर्व्यहार गरेको आरोप लाग्यो । कोनयर्सले सो कुरा सार्वजनिक नगर्न २७ हजार डलर पीडितलाई दिएको आरोपको कडा खण्डन र प्रतिवाद त गरे तर छानविन समितिले दोषी देखाएपछि सन २०१७ को डिसेम्बरमा राजिनामा दिन बाध्य बने ।
यी त केहि प्रतिनिधि उदाहरणमात्र हुन । अमेरिकी राजनीतिज्ञहरुका यौन काण्डहरुके लामै फेहरिस्त तयार पार्न सकिन्छ । खुला समाज अनि महिला हक र अधिकारमात्र होइन मानव अधिकारको लागि विश्वकै नमुना मुलक अमेरिकाका अधिकांश राज्यमा राजनीतिकर्मीहरुका यौन दुर्व्यहारका घटनाहरु सार्वजनिक हुने गरेका छन । कतिपय छानविनको अवस्थामा छन भने कतिपय राजनीतिकर्मीहरुले आरोप लागेपछि नै आफ्नो पदबाट राजिनामा दिइसकेका छन । कति त अझै कानुनी उपचारमै छन । पचासवटा राज्य रहेको अमेरिकामा हरेक राज्यमा कुनै न कुनै रुपका यौन काण्डहरु सार्वजनिक हुनु सामान्य जस्तै बनेको छ ।
यौन दुर्व्यहारको आरोप पनि लाग्छ, कानुनी लडाई चल्छ, कति प्रमाणित हुन्छन र कारवाहीपनि हुन्छ । कति भने नियतबस नै लगाइएको आरोप हुन्छ त्यसमा जसले आरोप लगाएको हो सोही व्यक्ति नै कानुनी कारवाहीमा परेका उदाहरणपनि धेरै छन अमेरिकामा । तर अमेरिकाको कानुन तुलनात्मक रुपमा चुस्त भएका कारण न्यायिक प्रक्रियालाइ आलटाल र ढाकछोप गर्ने सम्भावना कम भएको हुंदा यस्ता आरोप प्रमाणित भएपछि कानुनी कारवाहीको भागीदार भने धेरै बनेका छन ।
एजेन्सीकाे सहयाेगमा
फाेटाे विकिपिडिया
प्रतिक्रिया लेख्नुहोस्:-