अमेरिका ।
वायुमण्डलीय प्रदूषण र तापमान उत्सर्जनमा नेपाल जस्ता गरिब देश कारकको रूपमा नरहे पनि त्यसको भारी मूल्य चुकाउनु परेको परराष्ट्र मन्त्री प्रदीप ज्ञवालीले बताएका छन् । संयुक्त राष्ट्र सङ्घको महासभालाई आज अमेरिकाको न्यूयोकमा सम्बोधन गर्दै मन्त्री ज्ञवालीले नेपाल जस्ता गरिब मुलुकले पृथ्वीको ओजन तहलाई क्षति पुग्ने काम नगरे पनि त्यसबाट उत्पन्न प्राकृतिक असन्तुलनका सम्बन्धमा भएका केही अध्ययन प्रतिवेदनले औँल्याएका जोखिमपुर्ण तथ्यहरू प्रस्तुत गरे । मन्त्री ज्ञवालीका अनुसार इसिमोडले यसै वर्ष सार्वजनिक गरेको अध्ययन प्रतिवेदनले यो शताब्दीको अन्तसम्म हिन्दकोस र हिमालय क्षेत्रका एकतिहाइ ग्लेसियर पग्लिसक्ने र तापमान बढेर १०५ डिग्रीसम्म पुग्न सक्ने डरलाग्दा सूचकहरू अगाडि ल्याएको छ ।
हरेक वर्ष यसका नकारात्मक प्रभावको मारमा नेपाल पर्दै गएको पनि ज्ञवालीको दाबी छ । उनले भने “यसै वर्ष बाढी र हुरी बतासबाट थुप्रै नेपालीहरूको ज्यान गयो ।” उनले सबै मुलुकका प्रतिनिधिको ध्यान आकर्षण गर्दै जलवायु परिवर्तनको प्रभाव र असरलाई मध्यनजर गर्दै २०२० अप्रिलमा ‘सगरमाथा संवाद’ आयोजना गरिने बताए ।
उनले संयुक्त राष्ट्र सङ्घ सुरक्षा परिषद्को संरचनागत परिवर्तन , नरसंहारकारी हतियारको निःशस्त्रीकरणका विषयमा पनि नेपालको धारणा राखे । ज्ञवालीले संयुक्त राष्ट्रसङ्घको शान्ति मिसनमा नेपाली सेनाले गरिरहेको काम र सुरक्षाका हिसाबले कमजोर ठाउँमा उठाउनु परेको जोखिमको ध्यान आकर्षण गराए ।
प्रतिक्रिया लेख्नुहोस्:-